“Pesadiya tras pesadiya”, asina e director tecnico y presidente di e club deportivo infantil di Colombia “Jugar FL, Juan Paulo Garcia a defini e situacion cu un delegacion di 19 muchanan menor di 12 aña a pasa aden. El a lanta e scol di futbol aki cu e meta di promove e deporte aki, pero tambe pa crea alternativa positivo cerca e muchanan na Bogota.

 

E pesadiya a cuminsa unabes cu a wordo conoci e presencia di e coronavirus na Aruba. Y el a bira pio despues cu gobierno a bin cu un serie di medida pa evita cu e virus aki lo por sigui plama. Pero tambe e pesadiya a continua ora cu nan a bati porta di e Consulado di Colombia na Aruba, y no a wordo debidamente atendi. Tambe ora cu nan a busca solucion cerca e compania aereo Avianca. Apesar di e prome inconveniente cu nan tabatin cu e compania aereo aki, finalmente nan a haya confirmacion cu diabierna awor lo bini un vuelo, caminda nan lo por bay Colombia bek.

Torneo cancela

Diahuebs 12 di maart ultimo e delegacion deportivo aki a bin Aruba, caminda pa 25 aña consecutivo, nan ta bin participa den e evento deportivo Torneo Himno y Bandera, organisa pa LIFIDA. Ademas di participa den e torneo amistoso aki, tambe nan ta disfruta di e cambio di ambiente y di loke Aruba tin di ofrece pa su bishitantenan.

“Durante 5 lustro alrededor di 700 mucha Colombiano a bin Aruba pa competi deportivamente y disfruta di e bunita isla aki,” el a bisa

Tur aña e torneo aki ta lanta un gran expectativa cerca e muchanan di e club aki cu ta cuminsa prepara desde un aña prome. Pero tambe nan ta colecta fondo pa por cumpra nan ticketnan y cubri otro gastonan, durante nan estadia di un siman na Aruba.

Ora cu nan a yega Aruba tur cos tabata normal. Pero despues cu gobierno a informa riba e prome casonan di coronavirus y cu tur evento publico ta keda cancela, pues e decision di cancela e torneo aki debi na e situacion di e coronavirus, a cay pisa, specialmente cerca e muchanan cu a bira hopi tristo. Algun mucha a cuminsa yora y nan mayornan na Colombia a bira hopi preocupa.

“Si nos tabata sa cu e coronavirus tabata akinan y cu medidanan pisa lo bini na caminda, nos por a pospone e biahe,” el a bisa. A wordo organisa un partido amistoso durante nan estadia di un siman na Aruba, entre nan cu e team U-13 di Britania, pero tur cos a keda cancela pa proteccion di e mesun muchanan tambe.

Mirando e situacion cu a presenta, Garcia a tuma contacto cu e Consulado di Colombia na Aruba pa wak si nan por a haya ‘un ayudo of consideracion,’ el a bisa. E consulado tabata cera, pero via telefon nan a wordo atendi. Garcia a lamenta e forma ‘negligente’ cu e funcionario di e consulado cu a papia cune. “Nan a bisa nos cu nan no t’ey pa atende un asunto asina. Cu nan t’ey pa atende otro cosnan.” Ademas cu e consulado mes a haya un comunicado, unda nan no por intermedia pa asuntonan di vuelo, ticket, hotel, etc..

Segun Garcia el a insisti pa e consulado por brinda nan como Colombiano un tipo di guia of colaboracion, pasobra e “consulado ta un cas of un parti chikito di Colombia na Aruba.” E ta lamenta cu su delegacion deportivo di muchanan no por a conta absolutamente cu niun sorto di ayudo di e consulado aki.

E por a ripara cu unabes cu e situacion aki a wordo publica den social media pa 24Ora, cantidad di hende a haci nan comentario caminda nan tabata cuestiona e trabou cu e Consulado Colombiano ta bin realisando na Aruba.

“Mi por a ripara cu e ayudo cu e consulado ta brinda na e Colombianonan den e isla aki, ta masha pober mes.” E ta haya cu mester busca un solucion pa berdaderamente e consulado aki por traha debidamente y representa e interesnan di e Colombianonan.

E ta spera cu e situacion cu nan a pasa aden por yuda lanta mas consenshi cerca e delegacion diplomatico aki, pa nan por tin un tiki di curason pa yuda su hendenan, pero fundamentalmente pa nan cumpli cu nan trabou. Ya cu awe tabata su caso, pero mañan por ta otro hende mester di nan ayudo, y e consulado no ta hacie.

Na final, Garcia a expresa su gradicimento na LIFIDA, tambe na Blue Village, unda nan ta hospeda actualmente, tur social media di noticia cu a contribui pa nan por a haya un solucion y tur hende cu a brinda nan tur sosten y apoyo.