Ayera tardi, e di dos container di cuminda cu e Club Chines di Aruba y Asociacion di Comerciante Chines a trece for di Hulanda a yega como donacion pa e famianan den necesidad na Aruba.
Tur miembro di e club aki tabata basta activo y contento bahando e paletnan for di un container di 40 pia cu tur sorto di producto alimenticio. Presidente di Club Chines, William Cheng a declara na Bon Dia Aruba cu un par di siman pasa, nan a bin cu e prome container di cuminda pa yuda comunidad den necesidad.
Na momento cu Covid-19 a bati nos porta, dia 13 di maart ultimo, e mayoria di comerciante Chines a cera cabes pa crea un fondo destina pa busca dos container cu cuminda for di Hulanda. Nan a dicidi di entrega e dos container aki na Fundacion Pa Nos Comunidad, cu ta un banco di alimento.
E fundacion aki tin un lista di e famianan cu mester di e tipo di ayudo aki. William Cheng a bisa cu nan ta productonan alimenticio di bon calidad y tambe papel wc. Como Club Chines di Aruba y Asociacion di Comerciante Chines, nan ta contento di por a haci e donacion aki cu ta bay yuda mas cu 800 famia na Aruba.
Nan ta traha hunto cu Fundacion Pa Nos Comunidad. Nan ta encarga di entrega e donacion aki pa esunnan cu tin mester. Tambe Club Chines di Aruba ta sirbi como deposito temporal pa e fundacion conserva y administra tur e productonan aki.
Tin diferente fundacion cu ta traha cu Fundacion Pa Nos Comunidad y cu nan ta bin busca e ayudo aki pa reparti nan. “Anos no ta encarga pa parti’e, pero nan si ta encarga di haci’e. Cu e prome container, nan a haci hopi bon trabao. Y awor mi ta sigur cu nan ta bay haci un bon trabao atrobe,” William Cheng a bisa.
Cheng a laga sa cu nan tambe ta forma parti di e comunidad di Aruba. Nan ta biba hopi positivo y contento cu e mentalidad di semper ban yuda otro. “Mi ta kere nos ta happy island forever.”
