Den representacion di Camara di Comercio y Industria (KVK),president Satish Daryanani a participa den e sesion di brainstorming ‘Perspectiva Turismo: Scucha, Prensa, Recupera Miho’ cu a tuma luga recientemente. E motivacion pa forma parti di e dialogo cu otro sectornan di comunidad ta pa demostra e boluntad di duna tempo y aporte pa yega na un cambio den economia.

“Personanan cu ta presente akinan tambe a bin paso nan kier duna nan opinion y kier scucha. Mi ta wak cu ta persona cu por haci cambio hunto cu nos;hunto cu tur cu ta akinan. Nos no mester separa nos mes, nos mester uni nos mes, nos mester traha hunto. Cada persona mester carga su responsabilidad sea, e ta den Parlamento, den gobierno, of den comercio,” Daryanani a expresa.

Camara di Comercio y Industra ta cubri diferente sector di economia, for di zzpers y micro empresario, te na negoshinan chikito, mediano, grandi y tambe di sector hotelero. Pa loke ta trata e ultimo aki, Daryanani a indica cu, aunke ta pronostica un recuperacion cu lo tuma por lo menos 4 aña, tin ideanan di con pa haci mercadeo niche pa percura pa un mehoracion mas acelera.

E lider comercial tambe ta sperando ansiosamente e realisacion di e Triparti e caminda lo sinta cu Gobierno y sector sindical pa yega na un plan di accion. Ta spera cu sindicatonan lo por compronde cu mester traha hunto cu empresario pa cuida e bienestar di trahado, pero tambe pa por produci y asina sigui paga salario.

E evento, iniciativa di Partido di Pueblo Arubano (AVP), tabata similar na esun haci lunanan atras riba e topico di cuido medico. Adicional na Camara di Comercio, tambe a participa Aruba Gastronomic Association/Aruba Food & Beverage Association, Comerciantenan Uni Aruba, Mediador di Gobierno y ex director di AHATA, James Hepple. Tur a sinta na Renaissance Convention Center pa trece nan preocupacion y sugerencianan dilanti. “Mi a bin pa duna mi input, pa wak con nos por pone nos schoudernan hunto pa nos sali afo pa nos ciudadanonan y pa nos economia.”

E comision organisado di e sesion di brainstorming a consisti di lider di partido mr. Mike Eman, Jennifer Arends-Reyes, mr. drs. Richard Arends, Robert Candelaria, mr. Gerlien Croes y drs. Rene Herde. Nan tabatin oportunidad di haci pregunta na e invitadonan, pa consecuentemente delinea un pensamento y posibel solucionnan cu lo inclui den un informe.