(AP) – Presidente di Alemania, Frank-Walter Steinmeier, a ordena ayera e disolucion di e parlamento y a fiha e eleccion nobo pa dia 23 di februari, despues di e caida di e coalicion di e canciyer Olaf Scholz. Steinmeier a bisa cu esaki ta e unico manera pa duna e pais un gobierno stabiel cu por aborda su problemanan.
Scholz a perde un voto di confianza dia 16 di december y ta lidera un gobierno minoritario despues cu su coalicion di tres partido, cual tabata impopular y controversial, a cay dia 6 di november, ora cu Scholz a despedi di su minister di Finanzas den un disputa tocante con pa revitalisa e economia stagnante di Alemania.
Steinmeier a bisa cu e decision a ser tuma despues cu a consulta cu lidernan di partido y a conclui cu no tin acuerdo entre partidonan politico di Alemania pa forma un mayoria pa un gobierno nobo den e parlamento actual. “Precisamente den tempo dificil manera esaki, stabilidad ta rekeri un gobierno cu por tuma accion y un mayoria confiabel den parlamento,” el a bisa durante su anuncio na Berlin.
“P’esey mi ta convenci cu pa e bon di nos pais, un eleccion nobo ta e manera corecto.”
Mirando cu e constitucion despues di e Segunda Guera Mundial no ta permiti cu e Bundestag por disolve su mes, e decision a keda na Steinmeier si ta disolvi parlamento y convoca un eleccion. E tabatin 21 dia pa tuma e decision ey. Ora cu parlamento ser disolvi, eleccion mester tuma luga dentro di 60 dia. Lidernan di algun partido principal ya tabata di acuerdo cu e fecha di eleccion lo ta dia 23 di Februari, siete luna mas tempran cu loke originalmente a planifica.
Steinmeier a adverti tocante interferencia externo den e eleccion, mencionando cu esaki ta “un peliger pa democracia, no importa si ta scondi manera recientemente den e eleccion di Rumania, of publico, manera actualmente ta ser practica hopi intensivamente riba e plataforma X.”
Un corte supremo na Rumania a anula e prome ronda di eleccion presidencial di e pais, despues di e acusacionnan cu Rusia tabata opera un campaña online coordinado pa promove un stranhero ultra-derechista cu a gana e prome ronda.
E campaña ya ta na caminda. Encuestanan ta mustra cu e partido di Scholz a keda atras di e oposicion conservador Union, lidera pa Friedrich Merz. Vice-canciyer Robert Habeck di e partido ambientalista Greens, un otro partner di Scholz su gobierno, tambe ta busca pa keda den e puesto principal, aunke su partido ta atras den e encuestanan. Si e resultado di encuestanan ser confirma, e gobierno nobo lo probablemente ser lidera pa Merz como canciyer den coalicion cu al menos un otro partido.
Temanan clave ta inclui inmigracion, manera pa stimula e economia lento, y e miho manera pa yuda Ucrania den su lucha contra Rusia.
E partido populista y anti-inmigracion Alternative for Germany (AfD), cual ta mustrando un posicion fuerte den e encuestanan, a nomina Alice Weidel como su candidato pa canciyer, pero no tin ningun chens pa tuma e puesto pasobra otro partidonan ta rechasa di traha cu nan.
E sistema electoral di Alemania tradicionalmente ta produci coalicionnan, y encuestanan ta mustra cu ningun partido ta cerca di un mayoria absoluto riba su mes. Ta anticipa cu despues di eleccion lo tuma luga varios siman di negociacionnan pa forma un gobierno nobo.
Ta solamente e di cuarto biaha cu e Bundestag a ser disolvi bou di e constitucion despues di e Segunda Guera Mundial di Alemania. Esaki a pasa bou di canciyer Willy Brandt na 1972, Helmut Kohl na 1982 y Gerhard Schroeder na 2005. Schroeder a usa un voto di confianza pa fiha un eleccion tempran cual el a perde contra centro-derechista Angela Merkel.
