Presidente di AHATA, Tisa LaSorte a expresa su preocupacion cu cuido medico ta wordo afecta; y cu nos economia ta pasando den problema. Pero e ta haya cu tin ‘algun individuo’ ainda cu no ta compronde esey.
Mientras cu mayoria di nos comunidad ta consciente di e problematica cu nos ta pasando aden. P’esey comunidad ta pidiendo pa bin cu solucion, el a declara. “Y e solucion cu nos tin actual ta pa yega na un acuerdo cu Hulanda,” el a declara.
E ta haya cu nos economia ta recuperando mas slow di loke a wordo premira pa motibo di e di dos brote. Pues loke nos a premira cu e flexibilidad gradual como un recuperacion di nos economia no ta pasando, y mas bien e ta bayendo mas poco poco ainda. E hecho aki – segun presidente di AHATA – ta haci cu nos mester di ayudo.
El a pidi nos representantenan pa no scoge pa nos hende sufri mas cu mester. Ya tin famia cu ta pasando den necesidad grandi. Mientras cu pais Aruba mester tuma e solucion cu ta pone nos den un situacion cu mester intervencion di Hulanda. Pues e ta reconoce cu kisas no ‘tabata elegante’ e manera cu Hulanda a trata nos. Pero e intervencion di Hulanda tin tur intencion pa pone Aruba riba su pia bek riba nan propio caminda y cu un bon structura. “Pa un paso largo nos tin un autonomia cu ta mas saludabel,” el a declara
Encuanto e situacion actual den sector hotelero, presidente di AHATA a bisa cu tin hotelnan cu no a habri ainda. E ta haya cu hopi hende no ta realisa cu e subsidio di salario ta uno crucial pa nan por mantene nan trahadonan y mantene nan operacion, pero e no ta suficiente pa cubri tur nan gastonan.
Tin gastonan cu nan tin cu cubri te hasta ora cu no tin clientenan y esaki ta un factor cu ta pone e sector aki den un situacion precario. Aunke logicamente tin hotelnan cu ta miho para cu otro. Algun di nan tin un rosea financiero y p’esey nan t’ey, pero e rosea aki ta cabando mescos cu rosea financiero di gobierno. E ta haya cu no mester lubida cu actividad economico ta esun cu ta genera e placa cu ta yuda cubri e gastonan di gobierno.
Encuanto e temporada di bon temporada di nos industria turistico y kico e lo por a produci pa nos sector hotelero, presidente di AHATA a indica cu ta dificil pa bay splica kico ta wordo haci of no cu e reserva aki. Pero locual e kier splica ta cu e sector hotelero a cera 5 luna pasa y e gastonan ta mucho mas grandi cu djis salario. E gastonan tin di haci cu servicionan di e companianan di utilidad, mantencion, hipoteca, etc… “E gastonan ta grandi,” el a sigura.
