(AFP) – E presidente di El Salvador, Nayib Bukele, a anuncia cu e siman aki lo presenta na Congreso un proposicion di ley cu e cual ta busca cu bitcoin lo tin curso legal na e pais.
“E siman aki mi lo manda na Congreso un proyecto di ley e cual bitcoin lo bira un moneda di curso legal,” el a señala na un mensahe presenta den e conferencia di Bitcoin 2021 cu a tuma luga na ciudad Mericano di Miami, 4 y 5 di juni ultimo.
Segun e mandatario a splica, e obhetivo di e medida aki ta pa genera trabou y tambe “duna inclusion financiero na miles di persona pafo di economia formal”.
Segun Bukele, “70% di e poblacion Salvadoreño no tin un cuenta bancario y ta traha na economia informal”.
“Inclusion financiero no ta solamente un necesidad moral, sino tambe un forma di haci crece economia di e pais, proporcionando un acceso pa credito, spaar, inversionnan y transaccionnan sigur” Bukele a bisa riba su cuenta di Twitter.
Debi na pandemia di Covid-19, durante 2020 economia Salvadoreño a contrae un 7.9% pero e proyeccion di Banco Central di Reserva (BCR) ta cu ora 2021 lo cera lo crece alrededor di 6%.
Na momentonan aki, gobierno Salvadoreño no a duna mayor detaye riba e proposicion di ley di bitcoin cu lo presenta na Congreso, domina pa aliadonan di presidente Bukele.
Den economia basa na dollar di El Salvador, e remesa cu Salvadoreñonan ta manda for di stranhero ta un soporte importante y ta ekivalente na 22% di su Producto Interno Bruto (PIB).
Na 2020, e remesa a yega na un total di 5.918,6 miyon dollar, un aumento di 4.8% compara cu aña 2019, segun rapport oficial.
E entrada di remesa na e pais entre e luna di januari y maart a yega na mas di 1.705 miyon dollar, segun Banco Central di Reserva.
Bukele a considera cu bitcoin tambe ta representa “e forma mas lihe de crecemento pa transferi” e miles di miyon dollar ey di remesa y pa evita cu “miyones dollar” lo perde entre intermediario.
