![William Ruto, Rachel Ruto](https://www.bondia.com/wp-content/uploads/2024/07/Presidenta-di-Kenia-ta-despedi-di-ministernan-di-gabinete-despues-di-varios-siman-di-protesta-tocante-impuesto-y-mal-gobernacion-1_result-696x464.jpg)
(AP)—Presidente Keniano William Ruto a despedi di casi tur su miembronan di gabinete ayera y a priminti pa forma un gobierno nobo cu lo ta chikito y eficiente despues di varios siman di manifestacionnan tocante impuesto halto y mal gobernacion.
Den un adres televisa, e presidente tambe a despedi di e precurador general y a bisa cu e ministerionan lo ser encarga pa nan secretarianan permanente. Ruto a bisa cu el a tuma e decision despues di tende e pueblo y cu e lo forma un gobierno cu base amplia despues di consultanan.
Kenia a mira tres siman di inkietud den cual manifestadornan a drenta parlamento dia 25 di juni despues cu un legislacion di finanzas a aproba den cual a propone aumento di impuesto. Mas cu 30 persona a muri durante e manifestacionnan, cual a transforma den yamadonan pa e presidente retira.
Ruto a bisa cu e prome secretaria di gabinete, Musalia Mudavadi, cual ta un aliado politico clave, lo keda den oficina. El a bisa cu e despedida a sigui “un evaluacion holistico di e prestacion” di e gabinete y cu e gobierno nobo lo yud’e “acelera e implementacionnan necesario, urgente y ireversible di programanan radical pa aborda e peso di debe, aumentando recursonan domestico, expandiendo oportunidadnan di trabao, elimina sushedad y duplicacion innecesario di un multiplicidad di agencianan gubernamental y mata e dragon di corupcion.”
Ruto a apunta 21 minister di gabinete despues di su eleccion na 2022. Criticonan a acusa e presidente di scoge amigonan politico y alehando di practica tradicional di scoge tecnocratanan pa ta encarga di e ministerionan.
Tres minister a retira for di nan posicion eligi pa tuma afspraaknan ministerial. Otronan a perde eleccion y segun perspectivanan externo, a haya regalo di afspraaknan politico di e presidente. Varios ministerio incluyendo agricultura y salud a ser mancha pa scandalnan di corupcion envolviendo fertilisador falso y mal apropiacion di fondo.
E manifestantenan a acusa e gabinete di incompetencia, arogancia y muestranan di opulencia mientras Kenianonan ta lucha cu impuestonan halto y un crisis di costo di bida. Manifestantenan a haci un yamado pa e presidente retira aunke el a bisa cu e lo no firma e legislacion di finanzas cu ta propone impuestonan mas halto.
Ruto a pidi despensa diabierna pa e “arogancia y muestra di opulencia” pa legislador- y ministernan y a bisa cu a tuma responsabilidad y lo papia cu nan. El a anuncia medidanan estricto incluyendo e disolucion di 47 corporacion estatal cu funcionnan cu ta sobrepasa otro pa asina spaar placa y e retiro di fondo pa e oficina di e prome dama, entre otro.
Analista y comentador Herman Manyora a yama e despedido di e gabinete un “movida atrevido” cu tabata necesario pa calma e dessatisfacionnan den e pais. Esaki ta e prome biaha cu un presidente den oficina a despedi di ministernan di gabinete bao e constitucion nobo. E ultimo biaha algo similar a sosode tabata na 2005 despues di un referendum fracasa ora ex-presidente Mwai Kibaki a despedi di su ministernan pa eherce su autoridad politico.