(AP) – President Emmanuel Macron a bisa diahuebs cu Francia y su aliadonan por a stop e genocidio cu a tuma luga na Rwanda den aña 1994 pero tabatin falta di e boluntad pa haci esaki, un declaracion fuerte prome e pais Africano su di 30 aniversario di e genocidio cu a laga mas di 800,000 persona fayeci.
Macron su oficina a bisa den un declaracion cu e president Frances lo publica un video riba rednan social diadomingo ora cu Rwanda marca e conmemoracion solemne di e genocidio. Den e video, Macron ta bisa cu “Francia, cual por a stop e genocidio cu su aliadonan Africano y den Occidente, tabatin falta di e boluntad pa haci esaki.”
Den aña 2021, durante un bishita na e pais centro-Africano, Macron a admiti cu Francia su “responsabilidad” den e genocidio cu a laga mas di 800,000 persona, mas tanto Tutsis etnico y e Hutus cu a purba di proteha nan. E no a directamente pidi dusclpa, pero e president di Rwanda Paul Kagame a señala cu a bira pagina den e lasonan di Rwanda y Francia, siguiendo un serie di esfuersonan di Francia pa repara e lasonan entre e dos paisnan.
E gobierno di Rwanda tin hopi tempo ta acusa Francia di “facilita” e genocidio.
Desde cu el a ser elegi prome den aña 2017, Macron notablemente a comisiona un rapport tocante Francia su rol prome y durante e genocidio y a dicidi di habri e pais su archivonan for di e periodo aki na e publico. Den diadomingo su video, Macron a recorda cu ora e genocidio a cuminsa, “e comunidad internacional tabatin e conocemento pa tuma accion” basa riba conocemento tocante genocidionan cu a ser revela pa e sobrevivientenan di e genocidio na Armenia y e Holocausto, su oficina a bisa.
Macron lo reafirma cu “Francia ta para cu Rwanda y e pueblo di Rwanda, den memoria di e 1 miyon muchanan, muhenan y hombernan cu a ser asesina pa motibo cu nan a nace Tutsi,” su oficina a comunica.
