President Joe Biden ta pone reglanan nobo pa empleadonan federal

(AP) – Presidente Joe Biden riba diahuebs a anuncia un cantidad di rekisitonan pa miyones di trahadonan federal mientras cu el a anuncia un “tragedia Mericano” cual ta mortonan cu ta aumentando pero tambe por preveni completamente entre empleadonan sin vacuna di Merca y otronan tambe.

Empleadonan federal lo ser rekeri di comproba cu nan a ser vacuna contra di coronavirus of lo mester enfrenta test tur siman, uso di tapaboca obligatorio, distanciamento y hopi otro reglanan mas. E guianan nobo estricto tin como meta di aumenta e cantidadnan di vacunacion tumando luga den e 4 miyon Mericanonan cu ta ricibi salario federal y ta pone e ehempel pa e empleadonan di sector priva den e pais.

“Aworaki, demasiado hende ta fayeciendo of mirando un persona keri muri, y bisa “si solamente mi lo a ricibi e vacuna”,” Biden a comenta den East Room di e Cas Blanco. “Esaki ta un tragedia Mericano. Hendenan cu no mester muri ta fayeciendo.”

E administracion ta encurasha negoshinan pa sigui nan ehempel, y motiva e vacunacion pa medio di impone peso riba e personanan cu no ta vacuna, haci cu ta bira un inconveniencia di no ta vacuna. Den luga di haci mandato cu ta dicta cu e trahadonan federal mester vacuna, e plan ta di simplemente haci bida un poco dificil pa e personana cu no ta vacuna, pa asina motivanan na ricibi e vacuna.

Biden tambe a dirigi na e departmento di defensa y a pidi nan pa agrega e vacuna di COVID-19 na su lista di vacunanan rekeri pa miembronan militar. Tambe el a pidi su ekipo pa tuma e pasonan necesario pa por aplica e mesun rekisitonan aki na tur contratista federal.

Na mesun momento, a urgi e estado y gobiernonan local pa usa e fondonan cu e pakete di Coronavirus Relief a provee, pa por duna premionan pa vacunacion, ofreciendo 100 dollar na personanan cu ta ricibi nan vacuna, anunciando tambe cu tur negoshinan chikito y mediano lo ricibi recompensa si nan ofrece empleadonan tempo liber pa yuda nan miembronan di famia vacuna.

E President a keda ripiti cu e mayoria di e personanan cu ta birando malo y muriendo den e ola nobo aki di e variante delta di coronavirus ta e personanan cu no ta vacuna, poniendo otronan den riesgo y poniendo den peliger e nacion su recuperacion fragil economico y e regreso na normalidad.

“E ta un bendicion Mericano cu awo nos tin vacuna pa cada un y tur Mericano. E ta un pena pa no probecha e bendicion aki.” Biden a bisa.

Biden a elogia e Republicanonan, hopi di nan persona cu tabata considera nan mes conserva, cu recientemente a cuminsa urgi e personanan cu te ainda no ta vacuna pa ricibi nan vacuna.

“Esaki no ta trata di estadonan cora, ni estadonan blauw,” Biden a comenta. “Esaki ta trata bida y morto, bida y morto di hendenan cu ta forma nos comunidad.

Muchanan bao di 12 aña te ainda no ta eligibel pa ricibi e vacuna, aunke Biden a ripiti varios biaha su demanda pa scolnan habri completamente e siguiente aña escolar aki. Tambe el a bisa cu oficialnan publico di salud te ainda no ta kere cu Mericanonan mester un di tres dosis di e vacuna, aunke e variante delta ta causando asina hopi contagio.

Biden su movida pa e gobierno federal, cual ta e nacion su dunado di trabao mas grandi, y contratistanan federal ta bini den e momentonan unda cu e casonan di coronavirus ta keda aumenta, pa motibo di e grupitonan unda cu tin resistencia contra e vacuna den presencia di e variante contagioso delta. Un cantidad di corporacionnan grandi y algun gobierno local ta ordenando rekisitonan di nan mes, pero e administracion ta sinti cu ta haci falta hopi mas.

Sinembargo, resistencia lo bin sigur. E accion aki ta pone Biden den e centro di debatenan politico fuerte rondonando e gobierno su habilidad di convence Mericanonan pa sigui cu e protocol y reglananan di salud publico.

E gobierno directamente ta emplea casi 4 miyon hende, pero Biden su accion por afecta hopi hende mas ora cu e contratistanan federal tambe cay den e mandatonan aki. New York University su meneer di servicio publico Paul Light a estima cu casi 7 miyon empleado mas tin potencial di ser afecta, combinando esunnan cu ta traha den contract cu gobierno, y esunnan cu ta traha bao permiso federal.

E presion aki riba e empleadonan por traha pa motibo cu evidencia ta demostra cu hendenan lo prefera ricibi e vacuna, den luga di tin cu lidia cu e peso cu nan ta considera incomodo segun Lawrence Gostin, un meneer di ley global di salud na na Georgetown University Law School.

“Hendenan cu lo prefera di subi nan manga, y ricibi nan vacuna, na luga di pasa den testnan semanal,” el a agrega. “Den hopi diferente manera, esaki no ta un mandato, e ta duna e empleadonan aki un oportunidad di scoge loke nan ta prefera.”