FTA (Federacion di trahadonan di Aruba) ta celebrando nan 55 aña di aniversario. Hunto cu esaki nan ta tene nan dos dia di congreso pa miembro y asina bin cu punto dilanti relaciona cu nan preocupacion y preparacion.
Hubert Dirksz, presidente di FTA a bisa cu e prome dia nan tabatin e tratamento di notules y discusion di e relato anual di 2017 caminda a bin pregunta pa shop steward, pa asina por trece informacion claro pa un miho organisacion.
Segun Dirksz, mas pregunta a wordo contesta cu mas claridad. “Nos ta kere cu e ta yuda pa con mester trata cu e congreso cu ta atende cu autoridad maximo den organisacion. Mester transparencia den con ta haci’e.”
Riba e di dos dia, a continua presupuesto pa 2020 y e parti atardi a tende cu e relato di tur actividad cu tabatin den FTA. E shop steward presente a evalua y corigi na unda ta kere cu nan ta haciendo fout y a bin cu proposicion pa pone den nan maneho, pa asina dirigi organisacion pa 2020.
Pa locual ta trata e punto di preocupacion, a trata punto interno. Sinembargo a bin dilanti cu algun parti, manera e poder di compra, situacion scual y tambe impacto di situacion financiero di pais Aruba, temanan cu ‘ta keda bin pa dilanti’.
“Maske e ta leve, pero na momento cu tin cu bay trata cu e situacion real di e trahado di cada empresa, cada sector ta trata cu CAO, desaroyo den cada sector cu ta bay dilanti. Nos ta premira y nos sa cu tin sector cu ta bay mas miho den desaroyo, cu tin sector cu tin e dificil na mesa di negociacion. Nos no tin e facil”, el a splica
Sinembargo ,e parti hotelero a bay bon. Nan ta firmando CAO, pero e ‘cost of doing bussines’ ta keda un problema pa comerciante. E ta bisa cu economia no ta bayendo asina ‘smooth’, esey nos a mira diferente caminda. Locual tambe ta e sector comercio ta bayendo mas dificil.
“E sector di casino tin un problema y situacion cu mester wordo atendi y di basta tempo tabata colga. Tin e sector di banco cu tin reto y tambe mester bin e sector di construccion, cu ta parti di WAP, a presenta un proposicion y nos ta bezig atende cu nan y cu gobierno. Spera cu ilegalidad por wordo miho controla of preveni na Aruba”, el a expresa.
Pues, pa tin un bon actitud y competencia di esunnan cu mester haci control y cu ta duna boet necesario. Tocante e falta di control, e ta remarca cu tin hopi ilegalidad na pia di trabou riba diferente nivel, pues ta ‘trahando cu ilegalidad’.
Dirksz ta expresa cu ta mustra manera ta normal pa na Aruba biba di forma ilegal. El a bisa cu a yega tempo pa haya linea. “Nos no por keda papia so, si nos papia di integridad mester hala linea pa coregi tur caminda.”
E ta bisa cu un manera pa hacie ta pa e cuerpo di ambtenaar por cumpli cu nan deber pa coregi eror cu ta cometi pa e dunando di trabou, pero tambe na e sector di refineria, cu ta pendiente pa haya claridad di kico ta bay para cu e trahadonan tambe, pa e suspension di e acuerdo, y con ta bay para cu e trahadonan y kende ta para responsabel pa entrada di salario di trahado.
