(AP) – E president di Cyprus a bisa diamars cu el a personalmente pidi e hefe di e Union Europeo su brasa ehecutivo pa intercede cu autoridadnan di Lebanon pa stop gran cantidadnan di refugiadonan di Siria sali rumbo pa e nacion.
President nikos Christodoulides a conta reporteronan cu Lebanon ta beneficia di e sosten significante di Union Europeo pa ambos su propio ciudadanonan y pa e centenares di miles di refugiado di Siria cu nan ta sigui hospeda, pero esaki no ta bini sin responsabilidadnan. “E sosten aki no por ser duna mientras nos tin cu lidia cu e problema,” Christodoulides a bisa, agregando cu el a papia personalmente cu hefe di comision di Union Europeo Ursula von der Leyen.
Den e ultimo 48 ora, mas di 350 migrantenan y solicitante di asilo, casi exclusivamente nacionalnan di Siria, a yega Cyprus via boto, segun gobierno di e pais su vocero Constantinos Letymbiotis. Tin sospecha cu tin botonan di migrante cu ta na caminda.
Luna pasa, mas o menos 450 migrante di Siria abordo di 6 boto cu a ser mira na e costa di Cyprus dentro di 24 ora. Tur 6 boto a sali for di Lebanon. “Esaki no ta solamente e Republica di Cyprus pero sino Union Europeo mes cu ta enfrenta un problema serio, birando e fenomeno cu nos a mira den dianan recien,” Christodoulides a bisa.
Union Europeo ta dispuesto pa duna Lebanon mas placa pa lidia cu e cantidad grandi di refugiado cu e ta hospeda pero “pa esaki tuma luga, Lebanon no mester permiti e migrantenan sali y bin Cyprus,” el a declara. E presiden tambe a bisa cu e fluho recien di migrantenan di Siria a pone Cyprus back den “modo crisis” apesar di logra repatria den lunanan recien mas e migrantenan kendenan su solicitacion di asilo a ser rechasa cu esunnan cu a caba di yega.
