Recientemente e presentador di programa di television Argentino, Intrusos, Flor de la Ve tabata disfrutando di su vakantie familiar na Aruba y durante un actividad familiar, a pasa un momento di susto y ta conta di su experiencia.
“Casi mi ta perde mi casa haciendo snorkel, mi ta hura bo. Nos a bay nabega prome cu nos come, nos a bisti e vest y nos a drenta awa y nos a bay te na un rif cu tabata prome y despues e tabata lama habri,” e presentador a conta.
El a sigui conta cu despues di mira e bunita pisca y bida marino, na un momento el a nota cu su casa tabata sacando su cabes for di awa den un manera cu tabata mustra manera cu si e tabata hogando.
“Mi a bis’e ban back, pasobra e unico cos cu falta ta cu mi ta keda viuda pasobra e ta dificil pa trece un persona morto di afo, e no ta facil. Y mi tabata bisa kico mi ta bay haci? Mi ta keda viudo cu e muchanan, e scol. No, no. E ora nos a subi e barco y pica, el a keda malo henter e dia. Pero danki Dios e tabata simplemente un susto,” el a resalta.
E presentador di television a disfruta di varios dia di vakantie na Aruba hunto cu su casa Pablo Goycochea y su yiunan Paul y Isabella.
Aruba ta destacando entre e famosonan rond mundo den ultimo simannan. Recientemente tambe otro artista conoci, e actor Justin Baldoni, conoci pa su papel como Rafael Solano den e serie “Jane the Vrigin” y su ultimo papel Ryle Kincaid den e pelicula “It ends with Us” tambe tabata di vakantie na Aruba.
“Aruba… bo tin nos curason,” e actor a publica hunto cu un serie di potret di su vakantie hunto cu su famia na Aruba.
