Diabierna anochi e actuacion di Natusha Croes su obra Tactus na Cas di Cultura a tuma luga. Nos a combersa cu Maybeline Arends-Croes tocante e presentacion despues cu el a presencia esaki.

Tactus tabata un obra cu a combina diferente disciplina den un solo presentacion: poesia, video mapping, zonido di cadushi y performance. E artista mes tabata e suheto di e obra, hunto cu su elenco di cadushi y bushi cual a contribui un parti di e aspecto musical.

Despues di e show nos a papia cu un persona conoci den nos comunidad, Maybeline Arends-Croes kende tambe ta den mundo di arte. “Den trascurso di añanan ami mes como docente di musica ta mira hopi diferente show den diferente ramo di arte. Pero esaki mi a goza masha pasobra el a uza diferente medionan den combinacion y tecnologia moderno hunto cu naturalesa”, sra. Arends-Croes ta conta nos.

Sra. Arends-Croes a remarca cu e parti tecnico di e presentacion tabata extenso, specificamente pasobra a uza tanto elemento hunto y den harmonia pa realisa e show. Esaki tabata encera entre otro proyeccion di video riba un podium cu cadushi riba dje, zonidonan cu a wordo graba di antemano y claro tambe zonidonan live genera pa movimentonan cu e artista tabata haci.

“E presentacion a cuminsa cu arte di palabra y ora el a caba tambe el a bin bek cu esey. Mi a hay’e hopi creativo y di berdad e ta mustra con arte nunca ta caba. Naturalmente bo tin arte tradicional pero esaki tabata algo innovativo y ami como hende grandi a aprecia esaki.”

Tambe tabatin cierto elemento di improvisacion hinca den cada presentacion, segun sra. Arends-Croes. Esaki por a mira di e manera con ‘e tabata reaccion cada momento riba kico su curpa ta sinti spontaneamente, p’esey bo por mira cu cada ripiticion ta diferente y unico’. Esaki el a expresa ta similar na e tono di improvisacion den Jazz.

Sra. Arends-Croes tambe a elogia e manera con sra. Croes a bira completamente parti di e escenario. “Mi tabata puntra mi mes na cierto momento ta kico e ta touch pa traha e zonido. E mesun proyeccion cu a pone tur e imagennan riba e escenario a desvia locual tabata e realidad. Bo ta pensa cu e ta mishi yen cos pero despues bo ta bin ta realisa cu cadushi y bushi so e ta touch. E tabata un fantasia cu e imagennan a crea. Porta esaki ta un mensahe cu e artista tabatin den mente”.