Recientemente a tuma luga un anochi placentero na Biblioteca Nacional Aruba, unda a haci un presentacion di e obra literario di Denis Henriquez “Di ‘zuidstraat’ pa ‘klei’.” Durante e presentacion aki a conta cu presencia di Denis Henriquez mes, Wim Rutgers y tambe Mirto Lacle, ken a dirigi e anochi cu a marca e encuentro historico entre e autor di “Zuidstraat” cu un grupo cu a biba y nace na Zuidstraat, di un manera unico.

E anochi a cuminsa cu Sr. Mirto Lacle, preparando e ambiente pa un anochi yen di momentonan historico, chistoso y sentimental, na un manera alegre y yen di positividad. El a presenta e invitadonan special y e suheto di e presentacion, Sr. Denis Henriquez cu tabata presente cu su señora, expresando cu “specifico awe, nos ta bay trata e obra literario di Denis Henriquez. Nos no ta bay na algo specifico, mi ta bisa so, pero nos sa cu ora papia di Denis nos por bay na ‘71 ora cu el a bin Aruba pa traha 6/7 aña na Colegio Arubano.”

Sr. Lacle a sigui na duna inicio na e presentacion, pasando palabra na Sra. Astrid Britten. Cumindando e audiencia presente y tambe e autor, el a expresa cu e ta “contento di mira tur e caranan aki pa un presentacion literario di Sr. Denis Henriquez. Sigur un honor pa Denis ta aki na Biblioteca Nacional. Mi tabata presente tambe na Arubiana Caribiana pa e presentacion di su ultimo buki y awe nochi pa pasa door di su obranan manera nan ta yama “di ‘Zuidstraat’ pa ‘Klei’. Agregando tambe cu “nos tur tin hopi expectativa pa e presentacionnan, nos lo tin Sr. Mirto Lacle, Sr. Wim Rutgers y Sr. Denis mes.”

Despues di esaki, Sr. Lacle a tuma palabra back, y a sigui cu e programa di e anochi.

Sr. Lacle a cuminsa e presentacion splicando cu lesamento ta “un dialogo intimo entre e lesado y esun cu ta skirbi,” agregando cu literatura ta algo cu ta keda comparti cu lesado, y “masha hopi biaha mi ta usa e proverbio, pa nos por siña nos mester comparti. Pa siña, comparti.”

Presente tabatin tambe Sr. Wim Rutgers, ken Dr. Prof Michiel van Kempen a determina e grondlegger van de Caribische literatuur. Segun Sr. Lacle a comenta, “danki na Wim cu a skirbi un tomo basta diki cu el a dedica na Denis Henriquez. Nos sa con hopi trabao Wim a haci,” mustrando e buki y agregando cu “den e buki aki semper nos a menciona fuente. Y den esaki Wim a tuma basta pagina pa pone foco riba Denis.”

Denis Henriquez ta un autor cu a trata un gran rango di genero entre otro, “poesia, poesia den prosa y novela”, publica den “Papiamento, el a publica na Hulandes, na Ingles y den e bukinan e ta usa Spaño tambe. Tur genero,” Sr. Lacle a declara, compartiendo cu “Zuidstraat, su novela debut, a haya algun reseña masha positivo tanto den corantnan local y corantnan mas grandi.” El a clausura e prome fase di e anochi aki bisando cu “awe nos ta aki pa demostra na Denis nos gratitud.”

Wim Rutgers a sigui cu e programa dunando un bunita presentacion cu citacion di e obranan literario di Denis, treciendo dilanti un bista mas amplio y profundo di e obranan historico aki. El a expresa cu “Denis Henriquez ta un persona polifacetico. Denis a cuminsa cu Papiamento y despues a bay na Hulandes, pero nunca y ningun momento a lubida e lenga di su mama. Manera e mes a bisa den su prome obra poetico y ultimo obra di poesia “mi kier biba den lenga di mi mama.” Algo cu a resalta di Sr. Henriquez ta cu, manera a menciona, e ta un autor polifacetico. No solamente el a skirbi novelanan y obranan di poesia, pero tambe el a skirbi y publica texto pa teatro y pa pelicula. Ademas di esaki, e tabata “critica e situacion politico na un manera chistoso, cu entre otro texto y cantica,” Wim a conta.

Despues di e impresionante presentacion di Wim Rutgers, a duna espacio na Johny Scharbaai ken a deleita e audiencia cu bunita melodianan riba Piano. Manera semper, el a toca na un manera cu a capta e atencion di tur hende, y a transmiti e emocionnan di e cantica na tur esnan presente via cada nota cu el a toca. E audiencia tambe a deleita di un bunita presentacion musical di Maybeline Arends-Croes y grupo.

Finalmente a yega un di e partinan principal di e anochi, unda por a siña un poco mas di e gran autor Denis Henriquez. Anteriormente durante e anochi Sr. Mirto Lacle a menciona un entrevista cu a cuminsa graba cu Denis, y durante e anochi aki por a mira un parti di esaki. Den e video, Sr. Henriquez ta cuminsa conta cu el a “nace na Zuidstraat. Laga mi cuminsa cu e cos ey. Entre 3 hende muhe, sin tata. E persona mas importante no tabata mi mama, mi mama tabata un hende kibra, pero Vera, mi tanta, e tabata e autor realmente cu a traha’mi.” El a comparti cu su tanta Vera kier a mustra sociedad cu e ta haci algo di Denis, “un sorto di orguyo di dje.” “E tabata esun cu tabata trece buki, te cu dado momento mi mes por a bay boekhandel y cumpra buki.” Denis a conta cu te hasta cada biaha cu e tabata haya su rapport, cual semper tabata bin cu bon punto, e tabata bay trabao cu su rapport y mustra nan.

Durante e anochi aki a tuma tambe e oportunidad di entrega un recuerdo y reconocimento na e autor Denis Henriquez, “un fisico teorico, autor y ilustrador desde 1971 te awe como muestra di aprecio y gratitud pa bo dedicacion y contribucion incondicional na obranan literario, novela, poesia, textonan di teatro y guionnan cinematografico skirbi na Hulandes, Ingles y na Papiamento” di parti di Biblioteca Nacional, Departamento di Cultura y Sr. Mirto Lacle, gestor cultural.

Pa clausura e anochi, Sr. Denis a tuma palabra tambe, compartiendo cu esnan presente cu “bo ta nace, y si bo tin suerte bo tin bon tata bon mama etc. y si bo no tin suerte bo tin problema. Awo, mi mama no por a haci mucho cos pero mi tanta por a haci masha hopi cos mes. El a laga mi siña, trece buki pa mi, etc. Anto pa casualidad naturalesa a duna mi un bon sentido. E dos combinacion ey a haci cu mi tabata sa loke mi kier a haci” y asina el a termina ta studia fisica teorico, cual ta fisica caminda bo ta skirbi naturalesa di matematica.

Papiando tocante su futuro e tempo ey, e ta conta cu el a haya oferta di un trabao na Aruba pa duna les na colegio. Inicialmente el a pensa cu e no sa nada di duna les pero “casualmente e persona cu a bira mi señora su hendenan tabata biba na Aruba” y el a resulta ta bin Aruba pa traha como docente. “Asina mi a cuminsa traha na Colegio Arubano. Pero despues di 3 aña nos tabata biba masha nice den cas grandi cu yen cos rond di dje, naturalesa” y na final nan a dicidi di keda 3 aña mas. E idea tabata pa sigui cu fisica teorico, pero “e tempo ey mi a cuminsa skirbi, kiermen e idea di bay back den ciencia tabata drop out.”

“Skirbimento a bira p’ami e creatividad y asina cos a sigui, crece te cu mi a skirbi e ultimo buki, ‘Klei’.” y di e manera aki, di fisico teorico, Denis Henriquez a converti den un di e gran autornan historico den Aruba su bunita cultura.