Durante un conferencia di prensa dialuna atardi a tuma luga e introduccion di Fundacion BrassaVola y su proyectonan. Presidente di e fundacion, Joan Danies, a elabora tocante e fundacion y e metanan di esaki, y directora di Cas di Cultura, Vicky Arends, tambe presente na e conferencia a splica tocante un proyecto di Fundacion BrassaVola hunto cu Cas di Cultura.

Danies a cuminsa cu carera for di edad hoben den e mundo di arte y no ta un nomber desconoci na Aruba como un persona hopi activo den e mundo di teatro. Danies tambe ta docente di segundo grado di CKV na Colegio EPI.

Como presidente di Fundacion BrassaVola, Danies a indica cu e fundacion a wordo funda for di aña 2013 caba y aworaki nan a reactiva e fundacion back cu cuater miembro di directiva nobo. Segun Danies ta remarca e meta general di e fundacion ta pa incentiva y traha riba loke ta e area artistico di arte, teatro y tur tipo di disciplina en general.

El subraya tambe cu como fundacion nan ta traha cu docentenan, experto y no experto autorisa, pa loke ta e lidernan di diferente proyecto cu nan ta bay organisa.

“Pueblo di Aruba mester para keto ariba e importancia di tur disciplina, nos ta papiando di musica, baile, arte visual, arte di palabra, pero principalmente di teatro. Pakico teatro? pasobra teatro nos tin cu traha un poco mas riba dje, si nos mira ultimo añanan di teatro nos no tin mucho mas, casi mi por bisa cu teatro a bay den un tipo di coma pa mi no bisa cu el a muri”, Danies a expresa.

Danies a indica cu ta importante pa pueblo sa cu BrassaVola te’y back. El a splica cu nan ta bay traha den diferente districto, cuminsando na San Nicolas, sigui pa Tanki Leendert y por ultimo e districto di Oranjestad, caminda e hobennan cuminsando di cinco aña bay ariba te cu 60+ por participa den cualkier disciplina y area cu nan ta desea. Esaki ta bira pa medio di tayer, seminario y tur manera en general.

Pa loke ta trata e fondonan pa por realisa nan proyectonan, Danies a indica cu inicialmente BrassaVola tabata traha bao di mesun forsa, cu su mesun fondonan y tambe den cooperacion cu diferente otro fundacion, organisacion y instancianan. El a splica cu aworaki e fundacion a acerca Prins Bernard Cultuurfonds y nan tabatin nan prome reunion caba y segun Danies mes a expresa, “e ta mustra cu e ta bayendo den bon direccion pa loke ta subsidio”.

“E deseo ta pa tin un edificio, sinembargo esey no ta un parti cu nos ta lag’e stop nos di traha. Mi tin cu gradici señora Vicky Arends, pasobra eigenlijk ta e esun cu a cende e mecha back den mi persona y p’esey nos tey caminda nos ta awe unda ami ta e presidente hunto cu cuater miembro di directiva y tambe cu nos lidernan cada un di nan den nan disiciplina. Ohala nos por haya instancianan cu ta willing pa haci donacion na nos y gobierno para nos tras”, Danies a agrega.

Directora di Cas di Cultura, Vicky Arends, a anuncia cu na mei Cas di Cultura lo tin un proyecto den cooperacion cu Fundacion BrassaVola e cual ta un obra teatral titula “Daniel y e shimis Magico” cu ta un obra pa mucha cu tin como tema inclusion.

Relaciona cu e proyecto aki, Arends a anuncia cu diahuebs 31 di maart lo tin tryout pa e proyecto aki, pa motibo cu ainda nan ta buscando hende pa participa den e obra. El a informa cu di 5or pa 6or di atardi lo tin tryout pa muchanan te cu 12 aña di edad y di 6or di atardi pa 9or di anochi lo tin otro dirigi pa mucha y adulto di 12 aña bay ariba. El a enfatisa cu un y tur interesa por asisiti y auke no a wordo selecciona lo ricibi un les di teatro y lo por sigui cu esakinan cu e proyecto di BrassaVola den e diferente districtonan.

“Mi ta contento cu e mecha a wordo cendi y cu e candela a sigui kima y pa awe nos yega na un punto cu Fundacion BrassaVola a wordo restart pa asina por disfruta di teatro pa hoben y grandi”, Arends a agrega.

PR y comunication Officer di Cas di Cultura, Stanley Dabian tambe tabata presente y a enfatisa cu Departamento di Cultura tin como proridad e educacion di arte y cultura y DCA tambe tin varios proyecto, pero semper nan ta aplaudi e iniciativanan di fundacionnan cu ta duna un contribucion na arte y cultura pa hoben y adulto. Di esaki el a remarca cu nan ta bay man den man cu e meta di Fundacion BrassaVola cu ta promove, siña y participa na Aruba su arte y cultura y duna bida na teatro.

Segun Dabian a subraya Aruba tin un necesidad pa loke ta educacion di arte y cultura, e proyectonan di Fundacion BrassaVola según el a indica, lo por yuda na duna aporte y ayudo na salud mental a traves di arte.

“Di parti di Departamento di Cultura nos ta felicita Sra. Joan Danies, presidente di e fundacion, su directiva, boluntarionan y docentenan cu ta cla pa duna diferente aporte den varios disciplina di arte cu nos comunidad Arubiano tin mester di dje pasobra arte mester haya bida”, el a finalisa.