Presencia di mas turista a crea ambiente positivo na Aruba; Triple A: 4 mil pasahero y 40 vuelo

Un ambiente alegra casi festivo a wordo sinti durante fin di siman cu e presencia di bishitantenan di afo na Aruba, principalmente di Merca.

Despues cu diabierna ultimo nos espacio aereo a wordo habri mas pa facilita e vuelonan di diferente destino tabatin mas actividad rond di nos isla. Tabatin mas V-car circulando, mas hende den e mallnan, mas actividad acuatico y bida nocturno. Actividadnan cu nos no tabata wak asina activo durante e ultimo cuater lunanan.

Segun informacion divulga dia 9 di juli pa Aruba Airport Authority NV den su portal di Facebook, entre diabierna, diasabra y ayera diadomingo, nan tabata na expectativa di ricibi 40 vuelo y alrededor di 4 mil pasahero den nos terminal aereo.

Diabierna alrededor di 970 pasahero total a yega abordo di 13 vuelonan cu a bin shete for di nos region di Caribe Hulandes, 5 for di Merca y 1 for di Europa. Diasabra a yega alrededor di 1738 pasahero abordo di 14 vuelo: 2 di nos region, 10 for di Merca y dos for di Europa. Y ayera alrededor di 1278 pasahero a yega abordo di 13 vuelo: 5 di nos region di Caribe Hulandes, 7 for di Merca y 1 for di Europa.

Un di e bishitantenan cu a bin for di Merca pa disfruta di nos isla y relax na Aruba di e situacion di Covid cu ta afecta nan pais ta e pareha Smith. Tanto Greg como Vonda a bini for di estado di Kentucky. Nan ta biniendo Aruba durante e ultimo 3 añanan. Nan a bin pa un siman y nan prome actividad na Aruba cu nan ta gusta haci tur biaha, tabata bay pisca ayera.

Nan a catch varios tuna fish, locual tabata un bon piscamento. Pero e miho catch tabata cu nan a bin Aruba pa disfruta di dje. Nan tabata hopi contento cu nos a habri e frontera bek. Segun informacion internacional, Kentucky a registra un gran aumento di caso di Covid-19 diasabra cu 453 casonan nobo di e virus. E cifra total di caso den e estado Mericano aki ta alrededor di 19.121.

E pareha Smith ta e perfil di bishitantenan di Merca cu a cuminsa drenta Aruba. Bon Dia Aruba a papia cu un persona cu ta administra varios casnan y apartamentonan ofreci den Airbnb.

E persona aki kende a prefera di keda anonimo a laga sa cu ya tin varios reservacion haci di bishitantenan cu ta bin di Merca; y nan ta sigui drenta keto bay.

Mayoria di nan ta bin den grupo di dos, y minimo pa un siman pa relax y probecha di loke nan mester a gasta pa bin Aruba y cumpli cu tur rekisitonan y protocol exigi pa nos autoridad local. El a laga sa cu mayoria di nan ta bishitantenan cu pa añanan ta biniendo Aruba, y nan a keda fiel na nos producto turistico.