Den fin di siman cu ta bin, diabierna y diasabra, ta bay tuma luga e teatro musical ‘Mi ta un Artista’ presenta la Grupo di Teatro Zengenue di Fundacion CCCA (Crea y Conserva Arte y Cultura na Aruba) bao direccion di Sr. Ferdinand Franca.

E musical ‘Mi ta un Artista’ ta dedica na Samanta Westera Juppa, directora di scol di baile Club di Movimiento y Sonja Geevers, directora di scol di baile Step by Step.

Preparacionnan pa e musical ta den full swing y Franca ta conta un poco mas di con esaki ta bayendo. “Preparacionnan ta bayendo den bon direccion y nos ta trahando duro pa duna un bon presentacion,” el a indica.

Franca ta docente di CKV na Ceque College Mavo y ta director di teatro. Aña pasa e tabata encarga cu e musical ‘Planta awe, Cosecha mañan’, cu el a realisa hunto cu Maria College Mavo en conexion cu nan celebracion di 80 aña di existencia. Debi na e exito grandi di e musical aki, Franca a dicidi pa continua cu e genero di musical y trece mas obra di e genero aki original na Papiamento.

Franca a sigui conta cu e elenco ta bezig ta train duro y ta esforzando nan mes pa tur cos keda cla y presenta e musical ‘Mi ta un Artista’ na publico e weekend aki.

“Aworaki nos ta preparando e ultimo detaye, mester wak e vestuario y e decoracion di stage. E muchanan mes ta hopi entusiasma nan ta trahando duro. Tur loke ta actor, bailarina y elenco ta haciendo na best pa duna un bon presentacion,” Franca a remarca.

Durante e musical por spera presentacion di di diferente tipo di baile manera baile folklorico, moderno, rock and roll y mucho mas. Tambe ta bay tin presentacion di diferente grupo di baile, Kids & Youth in Action, Club di Movimento y un grupo di hoben dirigi pa Jason Wester y Shaindra Ashby.

E musical ta consisti di dos acto. Acto 1 ta refleha e soño y deseo di Francine pa bira un bailarina y na caminda e ta topa cu diferente obstaculo. Su adapadrinonan lo tey pa stimula y motiva pa e no rindi y lucha pa su soño. Acto 2 lo refleha tur loke ta e bataya interno di Francine pa por logra su soño y bira e persona cu e kier bira den futuro.

“Tur dos acto tin temanan di deseo, lucha pa bo pasion, no rindi, pensa cla y habri curason, bira e persona cu bo kier bira y hopi tema mas. Ta bay tin varios genero di musica, tecnica di teatro innovativo, bailenan moderno, y un decoracion y arte visual diferente. E ta un obra humoristico y magico, unda cu tur persona por siña hopi di dje,” Franca a indica.

Por ultimo Franca a extende su invitacion pa pueblo di Aruba pa bin apoya e futuro actor, director y bailarinanan di e mundo di teatro di Aruba.