Dialuna Aruba ta celebra su dia nacional 18 di maart, Dia di Himno y Bandera. Un celebracion cu tur aña ta trece cune un cantidad di festividad- y actividadnan rond di e isla.
Manera ta custumber, pueblo completo ta sali riba caya pa acudi, presencia y disfruta di e evento-, actividad- y celebracionnan cu tin full rond Aruba den e dianan di celebracion di 18 di maart.
E festividadnan ta ranca sali diadomingo anochi, 17 di maart, cu e manifestacion cultural cu ta tuma luga riba Plaza Libertador Betico Croes.
Durante e manifestacion cultural, ciudadanonan por disfruta di un anochi yen di ambiente, baile, musica, cuminda y cultura di Aruba. Ya caba e preparacionnan ta andando pa transforma Plaza Betico pa e gran evento aki.
Riba escenario di Plaza Betico cantantenan, gruponan musical y gruponan di baile lo haci diferente presentacion.
Kids and Youth in Action tambe ta den preparacion pa subi escenario y presenta dos baile cultural.
Directora di e grupo, Debra Boekhoudt, ta conta cu 18 di maart ta un di e fechanan mas importante riba kalender di e grupo.
“Tur aña nos ta look forward pa 18 di maart. Nos ta prepara pa baila diferente baile, diferente caminda. E muchanan gusta baila riba Plaza Betico. Pa nan e ta un presentacion importante y e aña aki cu nos tin e oportunidad pa baila atrobe nan ta train hopi duro y nan ta hopi entusiasma,” el a bisa.
Manera Kids and Youth in Action, diferente otro grupo tambe ta prepara no solamente pa presenta durante e manifestacion cultural, pero tambe pa representa nan grupo durante e acto protocolario dia 18 di maart mainta.
“E acto protocolario tambe ta hopi importante pa nos. Desfila dilanti tur e ministernan y su excelencia Gobernador ta algo hopi bunita y emocionante pa e muchanan. E aña tambe nos ta participa den e desfile di acto protocolario y e muchanan ta hopi entusiasma,” Boekhoudt a remarca.
