Riba su pagina di Facebook, SMAC a comparti un update pa cu Festival di Tumba, unda a mustra con a cuminsa prepara Balashi Beer Garden pa e evento cu ta programa pa tuma lugar diasabra awo!
Siman pasa, cinco banda a expresa mal contento cu e organisacion di e Festival di Tumba y a tuma e decision lamentable di no inscribi. Ta trata di Buleria, DLS, Suona, Shine Music y 1Oak. Nicole Martina a indica cu e bandanan a manda un carta pa SMAC, informando cu e bandanan en cuestion no lo participa den e festival e aña aki. Den e carta, a destaca falta di comunicacion y informacion como tambe falta di promocion pa e festival como e motibonan principal pakico e cinco banda a tuma nan decision.
Sinembargo, e festival ta continua cu participacion di otro artistanan.
Por ehemplo, pa e banda Grupo di Amigo ta bay canta Giliane Wester, e cantica ‘Baranca’ di compositor Ronwayne Kock y areglista Denny Loefstop.
Tambe den Tumba Loco ta bay participa e cantante Tyson Croes hunto cu banda Bomboshi Band, cantando ‘Pat’i Camel’ di compositornan y areglistanan Rygel Isabella y Ataniro, cu director musical Danny Koolman.
Porta ta habri pa 7pm y ta spera cu ta bay ta un evento yen di musica y ambiente.
