Na momento cu instancianan oficial manera entre otro Gobierno y Bureau Rampen Bestrijding informa cu den e siguiente dianan e posibilidad ta grandi pa nos experencia un horcan. Ta importante pa nos sigui cu preparacion.
72 ora of 4 dia prome cu yegada di horcan:
Pone un tas disponible den cual tur material y obheto importante ta wordo hinca. Considera esaki e “Tas di Emergencia”.
Acumula documentonan cu pa bo y bo famia ta importante manera Passport, historial di malesa of di medicina nesesario y hinca esakinan den ziplock di plastic y den e “Tas di Emergencia”.
Traha of cumpra un first aid kit consistiendo entre otro di pleister, betadine, gasa, verband y pildo pa dolor manera paracetamol of voltaren y demas articulonan cu por ser uza den caso di heridanan cu no ta rekeri asistencia medico inmediato.
Si bo persona of miembro di famia ta uza medicamento diario, controla y percura pa tin suficiente medicamento pa algun dia. Hinca e medicamentonan aki den ziplock y den e “Tas di Emergencia”. Haci mesun cos den caso cu un persona di famia ta haci uzo di un aparato diario.
Hinca algun snacks y boter di awa den e “Tas di Emergencia”.
Haci un solo persona responsabel pa tin y hiba cu ne e “Tas di Emergencia” na tur momento.
Percura pa tin flashlight cu bateria y tambe bela cu swaffle den cas.
Sinta y traha un plan di evacuacion den caso cu famia mester evacua di nan localidad. No lubida di incorpora mascotanan den plan di evacuacion.
Den e siguiente dianan, nos di Departamento di Salud Publico, hunto cu Bureau Rampen Bestrijding Aruba lo sigui duna mas recomendacion pa nos comunidad ta bon prepara pa e posibel yegada di horcan.
