Mirando cu nos a drenta e temporada di Horcan, Directie Volksgezondheid, tambe conoci como DVG a publica tip pa asina informa e comunidad di kico por haci pa prepara pa e temporada di horcan aki.

Tur aña Aruba y e otro islanan den Caribe ta drenta temporada di horcan den luna di Juni y esaki ta termina den luna di November. E lunanan aki ta wordo considera temporada di horcan debi na e cantidad grandi di tormentanan, cu den e lunanan aki, ta forma den Oceano Atlantico y cu ta dirigi nan mes pa region Caribe.

Pa por sobrevivi un horcan ta hopi importante pa cada individuo, conhuntamente cu su famia, ta bon prepara prome cu yegada di un horcan y sa kico pa haci durante y despues di horcan.

Apesar di e tempo moderno cu nos ta bibando aden unda cu pa medio di tecnologia por premira cu exactitud ki dia y na cua momento un horcan ta yegando un isla, no ta consehabel pa warda te ora cu e momento ta cerca pa cuminsa prepara. Si haci esaki, e posibilidad ta grandi cu bo lo no por prepara manera mester ta debi na e cantidad grandi di preparacionan cu ta necesario. Den un situacion di horcan hopi persona lo por drenta den panico y no por tuma e miho decisionnan. P’esey laga nos prepara cu anticipacion.

Aki nos prome lista, pa e temporada aki, cu tips pa bo ta debidamente prepara den caso di horcan:

Cana rond di cas, den cura y deshaci di materialnan no necesario cu por bula bay y causa peliger pa bo famia of tambe bisindario.

Materialnan cu ta necesario, warda esakinan un caminda cu nan no por bula bay of wanta esakinan di un forma pa evita cu nan por bula bay.

Tira un bista riba dak di cas pa shingles, zink of cualkier material riba dak cu por ta los, drecha esakinan. Si bo sa cu bo dak ta lek awa, drecha esaki lo miho posibel.

Programa den telefon di cada miembro di famia e numbernan di emergencia (manera 911 Emergencia – 100 Polis) y numbernan di miembronan di famia cercano (manera mama, tata, ruman, tanta, omo, wela, welo, suegra y suegro). Den caso di un horcan e numbernan di emergencia lo ta hopi ocupa pa cual motibo famianan cercano lo por yuda otro hopi mas lihe.

Den e siguiente dianan Departamento di Salud Publico hunto cu Bureau Rampen Bestrijding Aruba lo ta dunando mas informacion riba preparacion, stap pa stap, den caso di un posibel yegada di horcan.