Na aña 2024, Oranjestad, nos districto capital, ta celebrando su 200 aña di existencia. E tema aki a wordo trata recientemente entre directiva di Stichting Rancho y minister di Financia, Asunto Economico y Cultura, Xiomara Maduro.

E fundacion aki a bin cu e iniciativa di duna contenido na e conmemoracion aki. Como primicia director di Stichting Rancho, Clifford Rosa a referi na nan proyecto di 200 aña di Oranjestad. Nan a yega di presenta e logo cu nan ta bay cuminsa uza oficialmente pa conscientisa ‘nos comunidad tocante nos celebracion di 200 aña di Oranjestad,’ Rosa a declara na Bon Dia Aruba.

200 aña Oranjestad

Nan intencion ta di celebra na grandi, e hecho aki na aña 2024. Pero ya caba nan a inicia cu nan programa 2020-2024, y nan a bin cu e iniciativa di haci un presentacion na minister Maduro. Durante nan presentacion e fundacion a splica e mandatario pa kico nan kier celebra 200 aña di Oranjestad. Rosa a declara cu como fundacion nan ta cla pa carga e responsabilidad aki, y nan ta pidi gobierno di Aruba su colaboracion pa e fundacion aki por ehecuta cabalmente e proyecto aki. “Pa pidi gobierno su colaboracion pa duna fundacion Rancho e maneho di markthallen y Schoenerhaven,” el a bisa.

E reunion cu minister Maduro a tuma luga despues cu e fundacion a manda un carta pa diferente ministerio relaciona cu diferente topico, no solamente esun relaciona cu e di 200 aniversario di Oranjestad, pero tambe riba maneho. Rosa a laga sa cu e asunto di maneho ta mas tanto con nan kier wak fundacion Rancho funciona como un instancia independiente di gobierno den e area di Rancho y Oranjestad. Nan a presenta nan plan como organisacion no gubernamental. Nan ta spera cu gobierno por inverti den e proceso di e celebracion di dos siglo di Oranjestad. Pero tambe con nan por cuminsa describi e trabao den conhunto.

Markthallen y Schoenerhaven

Den e reunion aki un biaha mas e fundacion a expresa un biaha mas nan deseo pa conserva y maneha e markthallen y tambe Schoenerhaven. Rosa a bisa cu nan ta sitio emblematico cu ta poni den nan statuto cu nan mester ta den funcion di nan fundacion. Aunke nan a yega di vocifera den pasado e deseo aki, Rosa a bisa cu pa medio di e reunion cu minister Maduro, nan deseo a bira un peticion oficial y nan ta spera cu e ta wordo concretisa.

Rosa ta haya cu e dos sitio aki ta importante pa historia y cultura di Rancho, y nan tin temor cu nan por bay perdi debi na cierto desaroyo cu tin den e area aki. Nan fundacion ta pone enfasis riba maneho y proteccion di areanan cultural, pero no solo di Rancho sino di e area di waf tambe. Despues di e reunion aki cu minister Maduro, fundacion Rancho ta spera cu gobierno por aloca su atencion riba e ideanan cu nan a trece dilanti. Pa asina cuminsa pensa hunto con nan aporte lo por ta den e proyectonan aki. Otro proyecto pendiente tin di haci cu e laso historico y comercial cu ta uni Aruba cu region di Guajira.