Mayoria di e remedinan cu awendia ta wordo receta pa un dokter ta wordo traha den un fabrica y ta wordo cumpra cla caba pa un botica pa wordo entrega na un pashent. Esaki ta un bon desaroyo, pasobra e condicionnan bou cual un remedi ta wordo traha den un fabrica mester cuadra cu reglanan internacional di calidad. Trahamento di remedi den botica door di un boticario ta wordo yama ‘preparacion magistral’.
Tin caso unda no tin remedi traha den un fabrica cla caba pa trata un pashent. Den un caso asina un boticario lo traha e remedi for di e ingredientenan pa e pashent, por ehempel un crema, un enguente, un klistik of un likido pa tosamento.
Awendia tin remedi traha den un fabrica cla caba pa casi tur tipo di malesa y si no, semper tin un alternativa pa trata e malesa cu un otro remedi. Como tal AZV ta di opinion cu e no ta necesario mas pa bay laga un boticario traha remedinan for di su ingredientenan mientras tin alternativa.
Si acaso un dokter ta haya ta necesario cu su pashent ta uza un remedi cu mester wordo traha den botica e por manda un peticion cu motivacion pa e consehero medico na AZV pa e por wordo aproba. Solamente si no tin ningun alternativa entre e remedinan cla caba y solamente si ta bon motiva door di e dokter e peticion lo por wordo aproba
For di dia 1 di mei 2016 a cuminsa informa e dokternan caba tocante e maneho aki. Te awor no tawatin ningun problema cu esaki.
