Diasabra 16 di december ta clausura e iniciativa di Baki den Bario pa 2023, cual ta forma parti di e campaña Limpi Limpi. E iniciativa cu tin como meta pa fomenta habitonan di separacion cerca Aruba su ciudadanonan.
Na september 2023 a prome Baki den Bario a tuma luga na San Nicolas unda e lo termina back. Baki den Bario a cuminsa na acepta cinco diferente tipo di desperdicio basa riba e tipo cu mas tabata yega na Dump Parkietenbos.
Despues di evaluacion di e evento na San Nicolas, e decision strategico a wordo tuma pa pone baki apart pa taira y carton, a cuminsa acepta azeta di cushina usa y move e orario pa un ora mas prome. Baki den Bario ta entre 7’or te cu 11’or di mainta y lo tuma luga patras di e watertoren na San Nicolas.
Cambionan menciona a percura pa facilita e fluho di rotacion di e bakinan y tambe e procesamento responsabel y adecua di desperdicio. Specialmente separacion di azeta di cushina usa cu ta un problema grandi pa nos tuberianan na cas y pa nos sistema di rioolering.
E colaboracion cu Fundacion pa Nos Comunidad a bin ta representa un union positivo. Uniendo esfuersonan ta amplifica na un manera significante e iniciativa di e campaña nacional Limpi Limpi. No solamente ta incentiva ciudadanonan pa haci donacion di articulonan reusable, pero tambe ta trece conscientisacion pa contribui na e bienestar di famianan cu ta enfrenta dificultad den nos comunidad. Asina nos ta minimalisa desperdicio door di promove e habilidad pa reusa, poniendo un luz ariba e conexion di responsabilidad social y ambiental.
Serlimar a bin ta ofrece servicio di transporte di desperdicio pa e bakinan cu a yuda grandemente esnan cu no tabata tin manera pa trece esaki, specialmente nos adultonan mayor.
Loke ta remarcabel di ora a cuminsa cu e campaña nacional Limpi Limpi ta e aumento den conscientisacion en cuanto maneho di desperdicio. Mas persona ta adoptando practicanan di separacion y activamente contribuyendo na e preservacion di Aruba su medio ambiente.
Pa e ultimo Baki den Bario Minister Arends ta bolbe enfatisa cu no ta acepta asbestos mirando cu e ta un desperdicio di halto riesgo pa salud. Por contacta Dienst Technische Inspecties(DTI) pa informacion di compania nan cu ta registra cu tin permiso pa por atende cu asbestos.
Bureau City Inspector hunto cu tur otro partners y departamentonan a bin ta traha duro pa percura cu e preparacionnan ta cla di adelanta. Durante e actividad nan t’ey pa guia y coordina pa tene e fluho bou control y educa over di separacion na ciudadanonan. Un esfuerso conhunto pa por atende cu alrededor di 500 auto cu ta trece nan sushi y rotacion di mas di 60 baki. Un demostracion di sincronisacion y dedicacion cu sigur ta di aplaudi.
Minister Arends ta manda palabra di gradicimento na tur partners y tambe e ciudadanonan cu a sa di prepara y separa di antemano. Ciudadanonan cu a scucha e yamada pa reduci, reusa y recicla.
