Net prome cu aña escolar nobo cuminsa, Heart-Centered Leadership Foundation ta organisa un programa impactante y tranformativo pa hobennan entre 14-21 aña: Impact Camp. E prome Impact Camp lo ta un ‘ACE Program’ (Achievement and Commitment to Excellence), un programa di 3 dia cu ta traha riba caracter y desaroyo di e hoben.
E ta un programa interactivo y dibertido unda hobennan ta siña tocante diferente aspectonan cu ta yuda nan desaroyo. Topiconan cu lo bin dilanti durante e 3 dianan ta autoestima, motivacion, kico ta bo ‘comfort zone’ y con pa sali di dje pa logra bo metanan, comunicacion efectivo, responsabilidad personal, expresion propio, amistad, y hopi mas.
Impact Camp ta tuma luga dia 12 di augustus pa 14 di augustus, di 9:00am pa 4:30pm na Ballroom di Marriott Aruba. Edad di participacion ta 14 pa 21 aña. Na final ta culmina cu un ‘Anochi di Famia’ unda mayornan ta wordo invita pa bin presencia kico nan hobennan a experiencia. Ultimo dia pa registra como participante ta Diabierna 26 di juli 2019.
Mayornan of hobennan cu ta interesa di sa mas tocante e programa por comunica cu HeartCentered Leadership Foundation na 5942520 of 5841211. Of por manda nos un e-mail na hclfaruba@gmail.com Esaki lo ta e di 8 ‘ACE Program’ cu Heart-Centered Leadership Foundation ta ofrece hobennan. E programa a demostra di ofrece hobennan hermentnan pa nan sigui bay dilanti na school, empodera nan pa haci cambionan positivo den nan bida personal, comunica den un manera positivo y efectivo cu mayornan y amistadnan, y pone e prome stapnan pa traha riba un futuro feliz y duradero. Cu e programa aki ta traha riba transformacion di bida, fomentando hobennan responsabel, respetuoso, y resiliente cu ta firme para den nan sapato.
Heart-Centered Leadership Foundation a wordo funda na 2008 cu hobennan na curason di su meta: empodera y inspira hobennan pa lidera for di nan curason. Heart-Centered Leadership Foundation ta traha riba desaroyo di hoben door di ofrece diferente programa, seminario, ‘after school programs’, guia y coaching pa asina fomenta hobennan sigur di nan mes y determina.
