Departamento di Salud Publico (DVG) ayera atardi a tene un presentacion riba e importancia di structura bon e maneho di calamidad pa asina tur partnernan den cadena di cuido por ehecuta un trabou mas eficaz. Despues di mira situacion di calamidad na Sint Maarten DVG kier pa Aruba ta miho prepara pa cualkier eventualidad. Nos a puntra tambe si Aruba ta prepara pa Venezuela.

Ronald Geerman, lider di crisis y coordinado di crisis na DVG tene un presentacion ayera atardi pa un grupo di coleganan den sector medico cu lo ta trahando den cierto postnan medico en caso cu cierto calamidad pasa na Aruba. E postnan medico aki lo ta situa na cierto areanan strategico rond di isla den un situacion di calamidad en caso cu hospital no por maneha e fluho di persona regular. E postnan medico aki lo sostene un parti di persona cu por wordo herida en caso cu un calamidad surgi na Aruba pa asina hospital por atende cu e personanan cu situacion mas grave.

Sr. Geerman no a divulga cua edificionan a wordo destina pa postnan medico en caso di calamidad, pero si cu tin ‘diferente’ edificio cu a wordo destina pa esaki. En caso di un horcan por ehempel e sitionan aki lo wordo anuncia si nan a logra sobrevivi un calamidad di gran escala, segun e.

Relevancia situacion Venezuela
Nos a puntra sr. Geerman di DVG tambe si e reorganisacion y structuracion aki lo por ta un manera cu por deal cu cualkier fluho di persona di pais bisiña Venezuela cu lo por presenta. Sr. Geerman a reacciona bisando cu en principio esaki no ta e topico di e presentacion, pero si cu ‘naturalmente Aruba ta trahando riba plannan mirando nos cercania na costa di Punto Fijo. En caso cu haya un fluho di persona pa por yuda nan’.

Si sr. Geerman ta haya cu Aruba ta prepara pa un eventualidad asina, el a reacciona bisando cu ‘prepara ta un palabra grandi’. Pero sr. Geerman ta haya cu generalmente paisnan grandi ta migra bay paisnan grandi den situacionnan dificil. El a subraya cu nos tin cierto limite. Pues cu cualkier plan cu wordo traha mester tene cuenta pa esaki no stroba e cuido cu mester wordo ofreci na persona local. Esaki segun sr. Geerman ta un reto.

Di sr. Maduro su banda e ta haya cu ta un situacion hopi lamentabel loke ta pasando na Venezuela, ‘mi mes tin famia ey bou’. Ademas e tabatin hopi amigo cu tabata bin ki nan via boto– cual sr. Maduro ta conta ta un riesgo pa nan– pa asina haya poco placa pa yuda nan famia. “Cada dia hopi hende ta muri pa via di falta di remedi y falta di cuminda eynan, te hasta persona ta come for di bari sushi.”  P’e ta importante pa bon teamnan wordo crea pa asina es na nivel di director y ministerio por simplemente yama ora di situacionnan dificil. Subrayando e aspecto di solidaridad, sr. Maduro a expresa cu ‘nos tin cu yuda pasobra si mesun situacion lo pasa aki nan tambe lo yuda nos’.

Den tempo di crisis ta depende riba bon organisacion diario
Durante e presentacion mes unda tabata presente trahadonan di entre otro Wit Gele Kruis, Imsan y Hospital, sr. Geerman a splica con e maneho di calamidad ta structura. Esaki mas cu claro ta envolve diferente instancianan manera Cuerpo Policial, Cuerpo di Bombero, DVG y Departamento di Asuntonan Social cual ta sirbi como e prome instancianan cu mester tuma accion den caso di calamidad.

Sr. Geerman a duna diferente ehempel pa subraya e importancia pa cada partido conoce su rol bon, pa di e manera aki por percura pa eficiencia den caso di crisis. Durante e break nos a papia tambe cu Gregory Maduro, nurse na Wit-Gele Kruis kende a conta cu antes e conocemento di e structura ni di e tareanan cu mester wordo haci en caso cu ricibi un yamada urgente no tabata existi. “E ta un panico pa nos mes cu no a wordo splica kico pa haci pasobra e por ta un situacion fastioso ora bo no ta na altura di con cosnan tin cu bay.”

Aunke segun sr. Geerman hopi enfasis ta wordo poni riba instancianan cu ta mas halto den e structura di maneho di calamidad, ta importante pa tin un bon organisacion diario. E ta haya cu hopi atencion ta wordo poni riba Oficina pa Prevencion di Desaster mientras cu en berdad accion rapido di parti di por ehempel Cuerpo di Bombero of atencion medico ta loke ta importa den situacionnan dificil. Esaki ta di importancia te hasta ora no tin tempo di crisis, sr. Geerman a ilustra esaki por medio di e ehempel aña pasa ora henter un bus a desvia di caminda y a cay. “Aunke no tabatin heridonan esaki mes ta rekeri bon coordinacion.”

‘Pa situacion na Sint Maarten a yama Den Haag so’
Un otro ehempel cu sr. Geerman a duna ta cu ora horcan a dal Sint Maarten tabata yama solamente Den Haag pa ofrece ayudo, cual p’e no tabata un manera eficiente di traha. Esaki debido segun su persona entre otro pa via di e diferencia den orario. “Lo tabata miho pa nan no mester a depende asina hopi riba Den Haag. Pero tabatin hopi problema di comunicacion tambe cual meymey di un calamidad ta esencial.”

Na esaki sr. Maduro a agrega di su banda cu Sint Maarten mes tabatin un structura prepara, ‘pero cos a bay robes’. Di e manera aki por ilustra cu preparacion y realidad no ta na mesun nivel. Su persona ta haya si bon cu cada aña tin simulacion ta wordo haci pa deal cu situacionnan di horcan, etc. Aunke sr. Geerman a splica cu podise e manera con esaki a wordo trata a cuadra cu sistemanan legal di reino, e ta haya cu hopi por wordo siña di loke a pasa. P’esey sr. Geerman a expresa cu nan ta siñando di e situacion na Sint Maarten pa mehora e sistema na Aruba en caso cu tal cos pasa aki.