Despues di ultimo consultacionnan cu gobernador, Ernst Mohamed, presidente di directiva di Camara di Comercio (KvK) ta kere cu e miho solucion pa e problemanan actual ta pa forma un zakenkabinet. Omaira Lares, director di Departamento di Recurso Humano (DRH) a informa cu nan ta trahando riba un plan di transicion pa trahadonan di e gabinete demisionario. Derrick Werleman, director di Departamento di Financia di su banda a desmenti cu estado financiero di Aruba ta alarmante.

Ayera atardi a conclui e ronda di consultacionnan cu gobernador Alfonso Boekhoudt.
E ultimo instancianan cu a haya chens pa vocifera nan preocupacionnan y prioridadnan encuanto formacion di un gobierno nobo tabata Camara di Comercio (KvK), Departamento di Recurso Humano (DRH) y Departamento di Financia (DF).

Zakenkabinet
Loke sr. Mohamed a divulga di e combersacion cu a tene cu gobernador, tabata cu e gobernador a pone e rol di KvK bon cla. ‘Nos tin cu keda e bos di e checks and balances, particularmente den comercio’, sr. Mohamed a expresa. E deseo di KvK ta pa tur grupo y partido por haya otro den e proceso di formacion aki.

Sinembargo sr. Mohamed ta splica cu den su opinion e miho manera pa bay dilanti ta pa forma un zakenkabinet. Ta trata aki di un gabinete forma (parcialmente) pa personanan experto den e area cu ta eherce e poder ministerial. Pues ta trata di un gabinete cu ta forma (parcialmente) pa personanan sin afiliacion politico. “Nos ta kere cu esey lo trece mas transparencia y tambe personanan cu por eherce nan trabou. Mientrastanto e parlamento lo por eherce nan trabou di controla gobierno miho. E parlamento a priminti cu nan lo eherce nan trabou di control.”


Na mes momento sr. Mohamed a expresa cu ‘nos a compronde cu tin varios candidato cu lo kier fungi como minister’. Aki e presidente ta kere cu na e momento aki ta mas importante pa tene interes general di pais Aruba ariba un interes personal di kier bay den cierto posicion. “Ban tuma un momento pa refleha y wak kico ta mas bon pa e pueblo. Nos tin par di decision dificil cu mester wordo tuma, entre otro deficit den presupuesto y deficiencia den aparato gubernamental. E unico modo pa drecha esaki ta pa laga business people tuma business decisions y no decisionnan politico.”

Whitepaper di KvK pa proximo gobierno
Aunke sr. Mohamed tin un idea di loke lo ta e miho manera pa sigui dilanti, e ta pone enfasis riba e echo cu Camara di Comercio ta keda un instancia neutral. ‘Nos no ta pro of contra un partido of persona, nos ta pro Aruba.”

Pa yuda cu e proceso di formacion di gobierno, Camara di Comercio lo publica un whitepaper proximo siman unda nan lo delinea propuestanan pa enfrenta e problemanan cu tin riba mesa. Segun sr. Mohamed, gobernador a haya su copia caba. E ta conclui pa medio di ripiticion di e mensahe cu el a duna durante e di dos debate politico organisa pa KvK. Esta cu ‘nos mester tene bon cuenta cu e generacion Millennials y kico nan kier, pasobra nan ta e futuro generacion’. E dos partidonan grandi mester tene cuenta cu loke pueblo pidi di nan, enbes di ‘tende nan hendenan so’, segun e presidente di KvK.

Reto di DRH: maneha hopi personal cu team chikito
Durante reunion cu gobernador sra. Lares a conta cu a papia entre otro di preocupacionnan cu tin na DRH encuanto maneho di personal di gobierno. Cu e preocupacionnan aki sra. Lares ta supone cu lo mester informa e formado di gobierno ora wordo dicidi ken lo asumi e rol aki. Sra. Lares a declara cu e reto mas grandi cu e departamento ta enfrenta ta pa atende cu hopi departamento di gobierno, siendo un departamento relativamente chikito nan mes.

“Nos ta un departamento chikito di mas o menos 60 hende, cual 30 di nan ta atende cu casonan individual. E 30 hendenan aki ta atende cu un aparato gubernamental cu ta consisti di riba 4000 empleado publico. Esaki ta hopi pa un grupo di 30 hende pa maneha.” Sinembargo sra. Lares ta expresa cu nan no ta kere cu e solucion pa e problema aki ta pa trece mas trahado den DRH, si no pa bin cu maneranan mas eficiente di traha y otro sistemanan di traha. Cu esaki e departamento a cay un poco atras e ultimo lunanan, pasobra ‘nos mester a atende cu otro cosnan mas acelera’.

DRH tambe ta determina structura di organisacion
E rol di DRH no ta solamente uno pa atende e parti humano di aparato gubernamental, si no tambe pa determina e structura di organisacionnan den gobierno. “No ta importa e cantidad di departamento cu mester wordo maneha, lo importante ta pa organisa e funcionnan di manera mas eficiente. Aworaki nos tin un team na DRH cu ta trahando pa organisa e departamentonan grandi y crucial di gobierno. Nos ta yegando por ehempel na trata trabounan cu ta wordo haci dobel innecesariamente.

Sra. Lares a finalisa bisando cu DRH lo duna conseho na e gobierno nobo cu drenta riba con DRH ta wak cu mester organisa departamentonan. “E ora lo keda na nan pa tuma decision pa anos por sigui haci nos trabou.”

Reto financiero: entregamento di presupuesto na tempo
Sr. Werleman di su banda a declara bou tent dilanti gabinete di gobernador cu ‘e tema di financia publico semper, desde tempo cu Aruba a haya su Status Aparte, tabata yena cu retonan’. Sr. Werleman a nenga di bay mucho en detaye pa loke ta trata e combersacion cu a wordo teni cu gobernador. Pero el a splica cu definitivamente a trata tema di presupuesto 2018, ehercion di presupuesto 2017, reportahe y otro logistica cu mester tuma luga. ‘Ministernan por bin y bay, pero e temanan aki semper lo ta andando’, sr. Werleman a expresa. “Mi ta kere mester sigura nos mes cu mehoracionnan cu a tuma luga den entregamento di cosnan na tempo no bay perdi. Te hasta ora proceso di formacion ta tumando luga mester tene cuenta cu esaki.”

Si e proceso di formacion di gobierno tuma hopi tempo, e ta splica cu e ora ey lo ta un desafio grandi pa entrega presupuesto na tempo. Na nivel di conseho di minister esaki lo tuma su tempo. “Esaki debido na e proceso cu mester tuma luga na Conseho Consultativo cu mester tene cuenta cu ne. Pero tambe despues cu e pasa minister y Conseho Consultativo, parlamento mester tuma su tempo cu ne.”

Sr. Werleman ta desmenti cu estado financiero ta alarmante
Den boca di pueblo tin hopi preocupacion encuanto estado financiero di pais Aruba. Esaki por a tende durante temporada di campaña varios biaha. Na mes momento di parti di partidonan politico esaki tambe a wordo vocifera. Sinembargo sr. Werleman ta desmenti cu e estado di financia publico ta alarmante.

“Pero sigur cu tin hopi retonan nos dilanti ora ta trata di financia publico. Y esaki a wordo premira bon pa tur partido politico durante campaña. E desafio ta pa mantene financia publico na e leynan prescribi encuanto e saldo di presupuesto. Sigur cu tin preocupacion, pero manera nan ta bisa na Spaño: no hay que preocuparse, hay que ocuparse.”