Preocupacion riba yegada di mas clinica priva: Aruba mester por lo menos 20 dokter di cas adicional

Ayera tabatin un reunion di intercambio di opinion riba e registro di AruBig y kwaliteitsinstituut den Parlamento di Aruba cu presencia di Minister di Turismo, Salud y Deporte, Dangui Oduber y representante di e diferente organisacionnan profesional di salud, manera HAVA, VMSA, ASHA, ADS, fisioterapista, dentista, psicologo y psicoterapista.

E landsbesluit of ordenanza nacional cu nan kier bin cune tin di haci cu e profesional medico cu a gradua den nos region. Ta asina cu e aprobacion of registro di diploma pa profesional medico por eherce nan trabao na Aruba, ta demanda tambe e disponibilidad di un instituto cualifica cu por evalua corectamente nan formacion. Aproximadamente tin un grupo di 50 basisarts cu a gradua den nos region.

Presidente di Asociacion di Dokternan di Cas (HAVA), Dr. Joaquin van Trigt a bisa cu den nos cuadro legal di Aruba, actualmente e dokternan cu a gradua den nos region mester cumpli maximo cu e titulo di basisarts. Esaki kiermen cu nan no por eherce nan funcion como dokter independiente, sino bao supervision. E ta haya cu esaki ta un situacion cu no ta deseabel “ni pa nan y ni pa nos tampoco.”

Tin un impresion cu AruBig por soluciona un problema pa tur e dokternan cu a studia den nos region, pero Van Trigt a uza un frase pa ilustra e situacion aki: “Iemand blij maken met een dode mus.”

Tin cupo hopi limita pa basisarts na Aruba. E profesional aki no por yena e vacatura aki, sino cu den nan condicion, nan so por traha den localidad manera hospital y ImSan. Gewoon no tin mas cupo pa nan. Solamente y eventualmente si nan lo por haya otro manera pa nan eherce nan funcion sea den clinicanan priva.

Den AruBig ta poni cu lo busca otro manera pa nan por eherce nan funcion. E tendencia cu nan por wak na Aruba ta cu lo bini mas clinica priva, y esaki lo por trece ‘stress’ riba nos sistema regular di salud, segun presidente di HAVA.

Un preocupacion ta e propagacion den cuido medico, caminda personanan ta bin lanta clinica y duna nan mes cierto titulo, un fenomeno cu ta presenta hopi den nos region. E preocupacion latente tabata si esaki por trece un diferencia den e calidad di cuido medico. Y te hasta un discrepancia den e prijsnan di e servicio medico.

Van Trigt ta haya cu dificilmente nan por evalua cada clinica. Aunke Inspectie Volksgezondheid Aruba (IVA) t’ey pa eherce su funcion di inspeccion den sector medico. Como HAVA nan tin e temor cu esaki ta e tendencia cu ta bay pasa di bin cu mas clinica priva, ya cu no tin cupo pa acomoda tur basisarts. Aunke nan por a tende cu ministerio di Salubridad Publico ta bezig cu un ley cu lo bin cu cierto exigencia of rekisito di calidad pa cada instancia medico cu ta wordo habri riba nos isla.

Escasez di Dokter di Cas
Parlamentario Robert Candelaria (AVP) a formula varios pregunta, entre otro riba cuanto dokter di cas tin na Aruba actualmente? Tambe cuanto ta e cantidad ideal di dokter di cas cu por garantisa entre otro un bon servicio, ora cu un di nan ta falta?

Actualmente tin 48 dokter di cas na Aruba, segun presidente di HAVA. Sinembargo e cantidad aki ainda no ta suficiente. Tin algun di nan cu a bay cu pensioen. Otro situacion cu a surgi debi na e crisis Covid cu nos ta pasando aden, ta e presion cu esaki ta treciendo den mundo medico. Algun di nan ta pensando di stop mas tempran cu nan funcion. Esaki ta pone mas presion riba e servicio cu nan ta brinda.

Actualmente cada practica di dokter di cas tin alrededor di 2,300 pashent. Mientras cu ideal ta 2.100, esaki ta e caso por ehemplo na Hulanda. Pues cada consultorio tin 200 pashent di mas actualmente na Aruba. “Y e presion di trabao ta hopi halto,” el a bisa.

Mirando e panorama aki nan mester di por lo menos 20 dokter di cas mas. Nan mester dokternan pa core warda, ya cu den temporada di vakantie e situacion ta bira dificil. Den e caso aki un grupo di cuater consultorio di dokter di cas ta haci warda pa otro colega cu ta bay cu vakantie. Presidente di HAVA ta wak e situacion aki como uno no ideal, ya cu e por afecta e servicio di e pashent.

Actualmente pa medio di un colaboracion cu universidad na Hulanda y ImSan, profesional medico ta wordo prepara pa bira dokter di cas. E capacitacion aki ta wordo financia anualmente dor di AZV. Pero e organismo aki ta constantemente den presion finaciero. Esaki ta trece insiguridad si e capacitacion ta continua cada aña. Alrededor di 3 profesional medico ta drenta anualmente pa sigui e capacitacion aki pa bira dokter di cas den tres aña.

AruBig

Presidente di HAVA a bisa cu e AruBig ta bay ta specificamente pa specialista y no pa basisarts.

El a remarca cu e ley di AruBig ta specificamente pa yuda esnan cu a caba nan estudio pa “nan por haya un chens pa bay specialisa.” Tambe pa crea cuponan pa e basisarts por haya e chens di specialisa no solamente na Hulanda, sino den nos region.

Nan a conseha gobierno hunto cu AZV pa crea un tipo di aliansa cu universidadnan di e region pa acomoda nos dokternan cu a studia afo, pa nan por haya un miho chens pa haya un estudio specialisa, ya cu nos tin un escasez di specialistanan. Sinembargo e tipo di specialisacion aki ta hopi caro y dificilmente e hoben profesional por pag’e ariba nan mes. E ta un situacion cu posiblemente AZV lo por yuda cune financieramente.

El a clarifica e diferencia entre specialista y basisarts. Un basisarts a finalisa un estudio den medicina. Y na momento cu el a gradua, e ta un medico general, pero e no ta specialista ainda. Kiermen cu e mester haci un specialisacion cu na Hulanda ta varia entre 4 pa 6 aña pa e por tin e titulo como specialista.

Un medico specialista por eherce su funcion individualmente, entre nan esun di basisarts. Na Hulanda e ta otro, ya cu mester traha semper bou supervision. Mientras cu den algun pais di nos region ora cu bo ta gradua como medico ciruhano, bo por realisa cierto trabao. Pero e ta haya cu esaki no ta cuadra cu e ley AruBig. Ya cu si bo no tin un estudio como specialista, bo no mag di traha riba bo mes sino bao supervision.

Kwaliteitsinstituut

E punto di bista cu a wordo treci dilanti como HAVA y ASHA (Asociacion di Specialista Hospital di Aruba), nan ta haya cu un organo manera un kwaliteitsinstituut mester conta cu personalnan of hendenan cu experiencia den e mundo medico. Tambe riba tereno didactico. Mientras cu nos no tin un facultad di medicina na Aruba.

Na Hulanda y nos region –Van Trigt a splica – un instituto asina ta conta cu hendenan cu hopi aña di experiencia pa evalua un estudio haci riba tereno di salud, pero localmente nos no tine. Solamente si nos por tin un tipo di aliansa, por ehempel cu Hulanda of den nos region, unda nan por brinda nan experiencia pa yuda Aruba. Asina nos por evalua debidamente e tipo di estudio cu nan a ricibi durante nan formacion profesional, ya cu nan como dokter no tin e tipo di experiencia aki.

E ta un forma di ayudo pa asina nos por evalua si e tipo di estudio cu nos ta acepta pa drenta den e registro tin e nivel. Pero tambe pa demostra si e profesional cu a bin di nos region ta cumpli cu tur cualificacion. E ta haya cu ora un persona ta entrega su diploma, mester ta sigur cu e ta cumpli cu tur e rekisitonan cu nos ta exigi pa e profesional di salud cu kier traha na Aruba.