Gobierno pa medio di Minister di Enseñansa, Ciencia y Desaroyo Sostenible, Rudy Lampe a yega di anuncia cu te awor scol lo keda cera te dia 11 di mei debi na e crisis di Coronavirus/Covic-19.
Tanten lo sigui cu educacion a distancia ora cu e scol lo habri bek. Sinembargo te ainda no tin un bista exacto cuanto studiantenan ta atendiendo regularmente cu nan estudio via online of na distancia haciendo uzo di internet.
E mandatario a yega di señala cu e situacion actual ta stimula mas pa bay den direccion di educacion a distancia cu Lampe ta bin promoviendo desde cu a drenta gobierno. Pero Bon Dia Aruba a haya preocupacion di un docente cu ta mustra cu como maestro e ta haci lo miho di su banda pa digitalisa su les, y asina mas colega di dje ta haci’e tambe. Sinembargo e docente kende a prefera keda anonimo a trece dilanti cu e alumno na cas y mayornan tambe mester tuma nan responsabilidad na serio.
E docente aki ta haya cu hopi studiante no ta tumando nan estudio den e momento aki na serio. Es mas, hopi ta kere cu ta vakantie tin. Te hasta por ta e mayornan, y te hasta e docentenan tambe no sa mas con pa stimula e muchanan of yuda na cas. E docente a indica cu pa studia na cas a distancia mester di hopi disciplina; y den esaki mayornan mester pone di nan parti.
Bon Dia Aruba a canalisa e preocupacion aki cu Lampe, ya cu si e situacion aki ta sigui asina nos enseñansa tambe ta bay cay. E mandatario a contesta cu e resultado di enseñansa corectamente no ta depende solamente di e esfuerso di maestro, sino tambe di e alumno y di e mayornan. Pues mester keda motiva no solamente e maestro, sino tambe e alumno y e mayornan.
Mientras cu Lampe a keda di bin cu un inventarisacion cuanto mucha di nos poblacion escolar ta cumpliendo cu e alternativa di educacion a distancia. Y cual otro a keda atras debi na otro circunstancia entre otro acceso na internet y/of aparato pa asina sigui nan lesnan online. Pero tambe cuanto docentenan por a sigui dunando les via educacion a distancia.
Di su banda, SKOA pa medio di su Facebook-page a bin cu un encuesta tocante uzo di internet na cas.
E fundacion aki cu ta administra scol catolico na Aruba pa medio di encuesta aki nan kier haya un bista completo di e resultado di nan 10 mil alumno pa sa mas di nan situacion y aporta mas na nan enseñansa digital. E encuesta aki lo determina si tur alumno tin internet na cas, con e velocidad di internet ta y desde cua dispositivo of device nan ta haya internet.
