E menor di edad di 17 aña Rafaely Molina, un peticionario di asilo Venezolano, a scapa cuminsamento di october di e centro di detencion di menor na Corsou. Pendiente su peticion di asilo a dicidi di cera Molina aki, despues cu un Hues a dicidi cu e no mag warda su peticion cera na SDKK.
Segun abogado Maya Elzinga-Soumah, Corsou a crea un situacion insigur pa menornan di edad sin documentacion riba e isla. E procedura di asilo pa tanto menor di edad como mayor di edad no ta comunica claramente, cual defensor di pueblo (ombudsman) Keursley Concincion tambe ta indica. E organisacionnan envolvi pa e rason aki no sa ki procedura nan tin cu sigui.
Molina a yega Corsou sin permiso riba 11 di april. Den un boto, hunto cu 32 otro Venezolano sin documentacion. Abordo tabata sinta 2 otro menor di edad. Pero cuanto menor di edad tin en total riba e isla no ta conoci, segun e abogado Elzinga-Soumah, kende ta forma parti di un grupo di abogado cu ta purbando e personanan aki.
Concincion a indica cu poco tempo pasa el a haya e procedura di asilo den man, di parti di e Minister di Husticia Quincy Girigorie. E defensor di pueblo ta haya e procedura un poco corto, señalando na e tratado internacional pa derechonan di mucha. “Mi ta mir’e como un desaroyo positivo, pero ainda tin espacio pa mehoracion, siguramente si mira e situacion di menor di edad. Nan merece extra proteccion compara cu adultonan.”
Contra tratado di mucha.
Fundacion Human Rights Caribbean (HRC) ta mira e problema aki riba e isla tambe: “Nos a papia cu un par di mucha cu lamentablemente no ta haya e atencion medico cu nan tin mester di dje, y ta remarcabel cu tin ainda mas mucha riba e isla cu tin e problemanan aki. E mayornan hopi biaha tin miedo di bay e instancianan oficial cu e muchanan pasobra nan tin miedo di wordo deporta”, Janice Tjon Sien Kie, vocero di HRC a bisa.
Pa protege e grupo aki ta importante pa nan haya e mesun derechonan cu cualkier mucha tin a base di e tratado di mucha di Nacionnan Uni, y cu gobierno di Corsou pone su mes disponibel pa haci e trabou aki activamente. Relaciona cu esaki ta importante tambe tene cuenta cu articulo 22 di e tratado.
Tin un cantidad limita di persona cu ta pidiendo asilo na gobierno di Corsou, pero cifranan mas specifico tocante cuanto mucha ta den e situacion aki e fundacion no ta conoci cune. E fundacion tampoco ta na altura di un maneho specifico riba peticionario di asilo menor. Cera menor di edad a base cu nan no tin permiso di estadia ta loke HRC ta considera como ‘completamente contra e tratado di mucha di Nacionnan Uni’, segun Tjon Sien Kie.
Rafaely Molina mientrastanto atrobe a ser gara y a keda deteni den e prizon pa mucha. Minister di Husticia Quincy Girigorie no a reacciona riba e preguntanan di e procedura di asilo pa menor di edad.
Articulo 22 di tratado di derecho di mucha di Nacionnan Uni.
Cada mucha cu pidi asilo of cu ta reconoci como refugiado, tin derecho riba proteccion special y riba asistencia, si e ta acompaña pa mayornan of no. Gobierno mester haci esfuerso pa haya e mayornan of famia di muchanan cu ta nan so cu a huy. Si esey no logra, e mucha tin derecho riba e mesun proteccion cu cualkier otro mucha sin un mayor.
Potret cortesia Luis Villegas
