E aumento di caso positivo di Covid-19 na Aruba – despues di e celebracion di Pasco y tambe di Fin di Aña – tabata algo cu a wordo premira.

Esaki a pesar di e medidanan cu gobierno a bin cune na bispo di Fin di Aña pa contene e aumento di casonan cu awe a conoce e cifra preocupante di 110 caso nobo di hende contagia cu e virus aki. Di e cifra aki un (1) so tabata no residente. Ayera tambe un persona a fayece victima di Covid aumentando na 50 e cifra di morto na Aruba. Asina PR di DVG, Jurette Croes a informa durante un press briefing duna ayera tardi.

110 caso positivo pa Covid

Minister di Salubridad Publico, Dangui Oduber a mustra su preocupacion cu e aumento di casonan nobo. Mayoria di casonan di contagio ta den nos poblacion local y particularmente den casnan di famia, cu ta haci cu nan ta relaciona cu e celebracion di december ultimo. E ta pidi un gran comportamento di nos comunidad pa pone un paro riba e tendencia negativo aki.

Nan mester evalua den Crisis Team si nan mester introduci mas medida contra e plamacion di e virus. Nan ta consciente cu mas medida tin su efecto y consecuencia. Pero tin biaha e medidanan ta inevitabel. El a sigura cu si tin necesidad pa bin cu mas medida, nan lo bin cu nan pa contene e cantidad di casonan cu ta subiendo for di dos siman caba. Ayera a surpasa e cifra di shen caso positivo den un dia, esaki despues di hopi luna. Ayera DVG a informa cu e cifra oficial di casonan di Covid-19 a yega na 110 casonan nobo registra ayera.

Igualmente na momento cu e mandatario a duna su informacion ayera banda di 10’or di mainta, e por haya informacion cu cantidad di persona tabata bezig pa test den hospital. Esaki no ta descarta cu awe lo bira otro dia cu nos lo por ricibi mas cu 100 caso positivo pa Covid. E ta spera cu e situacion aki lo por mehora, y e ta pidi comunidad e comportamento necesario y tambe pa nan sea responsabel pa cuida nan mes y esunnan mas vulnerabel di nos comunidad pa baha e cifra aki back. Pa asina nos pais por sigui den recuperacion di nos sector turistico y nos economia.

Bishitante y test dudoso

Tambe el a referi cu nos autoridad di salubridad publico a yega di confronta na aeropuerto e bishitantenan cu ta bin cu testnan dudoso. Of nan ta resultado cu nan ta manipula.

E persona cu ta bin cu un test falso of manipula mester paga un multa tambe. Nan ta confronta un of dos caso pa dia di persona cu ta haci uso di un resultado di test dudoso.

Esaki ta rekeri cu e persona mester haci un PCR test di nobo na aeropuerto. No semper – segun e mandatario – e decision aki ta cay na agrado di e turista; y te hasta tin algun di nan cu ta resisti pa no haci e test aki; pero nan ta masha tiki.

E hecho ta cu nan no por obliga un turista ni un local di haci un test. Pero si nan mester bay 10 dia den cuarentena y esaki ta conta tanto pa local como pa bishitante. Den caso cu nan ta viola e cuarentena nan ta haya un multa, ya cu nan ta wordo controla pa e task force. Tambe e seguro di Covid cu ta wordo exigi na e turista ta cubri e gastonan den caso cu e mester bay den cuarentena.