Presidente di Aruba Bird Life Conservation (ABC) a bati alarma pa e situacion na Santo Largo.
Segun e ta bisa, e mangelnan aki (riba potret) ta muriendo masalmente pa motibo cu no tin suministro di awa. Sr. Peterson ta tira e culpa riba trabou di infrastructura den e area aki cu a haci cu e awa di lama no ta yega e mangelnan mas. E ta haci un yamada pa departamentonan di DOW, DIP y Medio Ambiente pa soluciona e problema y evita cu e area completo di mangel ta wordo destrui.
Nos a purba di haya un comentario for di e departamentonan concerni pero te ainda no a logra.
Areanan proteha di naturalesa
Sr. Peterson, cu tambe ta presidente di directiva di Parke Arikok tambe a haci un suplica pa gobierno no lubida riba su promesa pa traspasa e otro areanan di naturalesa pa Arikok. Pa asina por proteha nan. Gobierno y Arikok a firma un acuerdo di principio pa mas pronto posibel e areanan lo cay bou e parke. Na april caba e area di Spaans Lagoen a wordo traspasa y ainda tin 15 area pendiente.
“Te awor solamente un area a wordo añadi na Parke Nacional Arikok. Spera cu gobierno lo mantene su mes na su palabra prome cu eleccion. Pa e otro areanan priminti tambe lo wordo inclui y proteha”, asina sr. Peterson ta remarca.
Na april e traspaso di Spaans Lagoen a sosode durante e bishita di prinses Beatrix. E tempo ey sr. Peterson a bisa den un entrevista cu Bon Dia Aruba cu e gobierno actual su vision green no a haci Aruba mas berde. “Nan vision ta uno bunita, pero e ta enfoca riba energia sostenibel. Nos como NGO nan ta yama e vision ey shinishi, no berde. Pero awor nos tin un par di ministernan cu a cambia di idea y ta cuminsa duna sosten. Hunto cu e desaroyo di energia berde pero tambe conservacion di naturalesa, Aruba si lo bira mas berde.”
Sinembargo te awe e 15 area no ta inclui den e parke y no ta cla den cua termino gobierno kier regla esaki.
