Preocupacion di taxistanan cu maneho di aeropuerto

Un grupo di taxi ta mustra nan preocupacion tocante e asunto di JetBlue cu lo cuminsa huur bus pa turista cu bay cu nan aerolinea lo tin acceso na e bus. Shamilla Loefstok hunto cu otro taxista a comparti nan preocupacion.

Loefstok ta splica cu a tene un reunion cu Minister Dangui Oduber (MEP) pa asina cierto cosnan por cana miho. El a bisa cu a papia riba varios punto. Un di nan tabata cu e mandatario lo a reuni cu e compania pa asina trece aclaracion, pa motibo cu Oduber no tabata sa di e asunto.

Segun e tour guide a bisa cu no por menciona pa motibo cu ta un promocion. Segun Loefstok ta agrega cu e mandatario a bisa cu no a acepta esey den ningun momento y cu lo drecha esey for di aeropuerto.

E ta bisa cu un carta a wordo entrega cerca nan, pa motibo cu ya caba tin asina hopi competencia pa locual ta trata e parti di entrada/ salida, e porcentahe cu mester wordo reparti y cu tin demasiado permiso pa tur cos.

Loefstok ta expresa cu tin varios ta abusa di e trabou di otro hende. Unda cu tin permiso, pero no di taxi y esey ta bruha e turista na cua transportacion e tin cu uza, pa motibo cu e tur dos ta T, sea den tour of taxi.

Sinembargo, el a menciona cu ta pidi pa un borchi caminda e turista no mester keda confundi y di biaha ora e sali for di aeropuerto e sa unda e por busca su transporte. “Nos taxista ta wordo kita 115 florin pa aña pa por para paden.”

E sistema di aeropuerto ta pone cu esunnan cu ta paga por para paden y esunnan cu no ta paga ta djis pasa na e otro liña pa busca y drop off. E taxista ta propone di e 115 florin cu ta duna pa kita 5 florin di esey y inverti den un borchi.

Di e forma ey tur ta haya un fair share y turista por compronde unda nan por coy un bus of un taxi. Nan a manda nan carta y lo warda reaccion pa wak cu aeropuerto pa wak kico lo bira e contesta.

Loefstok tambe a menciona cu a tene otro reunion cu DTP su director pa amplia tambe riba otro cambio cu nan kier wak dilanti. E problema ta bira cu tin taxi ta cobrando un tarifa demasiado halto pa e turista.

E ta agrega cu esey no ta permiti, pasobra nan tin un lista di prijs y mester tene nan mes cu e regla ‘nan mester ta mara na ley’. Ta ricibi keho di turista cu ta keda cambia tarifa, anto esey segun Loefstok ta peligroso pa nan trabou.

Ta pone opcion pa ora e turista por wak e tarifa di e prijs of pone e tarifa den e auto caminda e turista por wak cua ta e prijs. “E ta bira un peliger pa nos turista. E problema aki mester wordo atendi. Nos tin cu cumpli cu locual ley ta bisa y tene na e prijs.”