(CuraçaoChronicle) – Preocupacion creciente a surgi dentro di e parlamento di Corsou tocante supuesto discriminacion institucional na Kranshi, e oficina di registro civil, particularmente afectando e ciudadanonan di descendencia Dominicano cu ta enfrenta dificultad den obtene documentonan oficial.

Miembro di Parlamento Ana-Maria Pauletta di PAR a trece dilanti e problema despues di un lectura di antropologo Sabrina Dinmohamed, ken a haci un investigacion tocante migrantenan Dominicano bibando riba e isla.

Segun Pauletta, e ciudadanonan Dominicano – incluyendo yiunan naci na Corsou cu mayornan Dominicano – hopi biaha ta trata eroneamente como stranhero. Den algun caso, e mal clasificacion aki ta resulta den e perdida di paspoort di e individuonan aki, y nan nacionalidad. Pauletta a describi e situacion como uno cu ta inaceptable y a haci yamado pa reconocimento y un fin na e practica discriminatorio aki.

“E ta un hecho cu na momento aki, e comunidad Dominicano specificamente ta enfrenta discriminacion institucional na Kranshi,” Pauletta a bisa den su declaracion.

El a urgi gobierno tuma accion inmediatamente pa atende e problema aki y garantisa cu tur ciudadano lo ricibi trato igual bao e ley.

No tin excepcion: Kranshi ta provee servicio igual na tur ciudadano

Kranshi a emiti un declaracion unda a informa e comunidad tocante e calidad di servicio cu e ta provee na e publico. Kranshi a enfatisa cu su servicionan no ta duna prioridad na ningun grupo of individuo, garantisando cu tur hende ta ricibi e mesun nivel di atencion y asistencia, di acuerdo cu e regulacionnan y protocolnan estableci.

Kranshi a tuma nota di un articulo publica den media di diahuebs dia 25 di april, den 2025, cual a bisa cu e departamento por ofrece servicio selectivo cu trato preferencial. E departamento a clarifica cu e tipo di acusacionnan aki no tin base y cu Kranshi, conhuntamente cu otro departamentonan bao e ministerio di Gobernacion, Plan y Servicio Publico, tin audit regular pa garantisa y mehora e calidad di servicio cu ta provee na e pueblo di Corsou. E meta ta di garantisa cu tur cliente, sin excepcion, ricibi e mesun atencion y cuido.

E procesonan y proceduranan dentro di Kranshi ta claramente delinea, garantisando cu tur ciudadano mester ricibi un trato uniforme. E departamento tambe ta mantene supervision continuo pa mantene standard di servicio y satisfaccion di cliente na henter Corsou.

Den pasado, Kranshi a nota cierto caso unda individuonan a haci mal uso di e departamento su servicionan, sea pa medio di ricibi informacion incorecto of ricibi documentonan cu no tabata match e situacion actual. Den respuesta na esaki, Kranshi a fortalece control riba cierto documento y procedura. Aunke esaki por a causa cu algun a kere cu e departamento ta dunando trato preferencial, e departamento ta garantisa pueblo cu esaki no ta e caso.

Empleadonan di Kranshi ta evalua detayadamente y verifica tur documento di acuerdo cu e reglanan estableci pa preveni cualkier registro incorecto. E departamento tambe ta enfatisa cu no tin luga pa discriminacion, trato selectivo of servicio preferencial na cualkier individuo. Si cualkier empleado publico na Kranshi keda gara ta haci e tipo di comportamento aki, accion discriplinario ta ser tuma.

E departamento a declara tambe cu mantene e integridad di e recordnan oficial ta un prioridad y esaki ta keda un principio fundamental na Kranshi. E control riba documentonan ta aplica na tur momento, garantisando cu no tin trato preferencial na cualkier grupo of nacionalidad.

Cu e clarificacion aki, Kranshi ta spera di por desmenti cualkier rumor of aclaria cualkier mal comprension cu ta circulando den comunidad y reafirma su compromiso na duna servicio na tur ciudadano di manera igual.