Preocupa pa stabilidad di florin: E futuro trahador di Aruba lo hereda un peso di debe sin precedente

Si kier mantene valor di florin na Afl. 1.79 pa US$ 1, gobierno di Aruba mester tuma medida urgente pa drecha su finanzas publico. Esakinan tabata advertencianan di S&P, Fitch, Fondo Monetario Internacional (IMF) y Hulanda. Tur a informa cu Aruba tin un finanzas publico deplorable.

Bon Dia Aruba a tuma tempo pa analisa e situacion economico financiero, despues cu dr. Arjen Alberts a adverti den e corant aki cu valor di florin por ta na peligro, particularmente pa motibo cu no tin entrada suficiente na divisa grandi y cu prestamonan local di parti di Gobierno lo significa mas consumo, pues mas uso di e reservanan. Banco Central mesora a saca un comunicado, cu ta ilustra cu posicion di divisas di Aruba ta fuerte, unda tin 10 luna di reserva. Esaki debi na e hecho cu valor di e reserva di oro a subi drasticamente y cu tin medidanan pa mitiga salida di divisas.

E importacionnan actual ta mucho mas abao cu locual e tabata prome cu Covid19. No tin importacion pa un turismo robusto. Pues, pa Aruba mes, e importacion ta mucho menos. Mas ainda, Hulanda a manda dos tranche di sosten na dollars cu a contribui na e reserva di divisas.” Mas ainda, debi na e medida di Banco Central di Aruba, e fondonan di pension di APFA, y otro fondonan di pension cu normalmente ta inverti 40 porciento den exterior, na e momentonan aki ta wanta tur e placa na Aruba. Pues no tin e peticion pa dollars pa inversion den exterior. Esey ta contribui na un stabilisacion di reserva. “Locual dr. Alberts a indica corectamente, ta cu e reservanan no ta creciendo, pasobra turismo ainda ta na nivel hopi abao. Pero, Aruba mester di sigui importa. Mester di combustibel, cuminda, cuido medico, pagonan di prestamonan internacional. Y awor a saca bononan cu ta crea florin, y no dollar.”

Den su comunicado, Banco Central di Aruba a referi na su reserva di divisa cu entre otro ta fuerte debi na e aumento di valor di oro y como tal dr. Alberts no lo tabata corecto den su ponencianan.

Sinembargo, ta un hecho cu e placa cu Gobierno ta presta riba mercado local cu ta pa paga salario y tambe FASE y Loonsubsidie te cu december y esaki ta significa miyones di florin den circulacion den economia di Aruba sin cu tin e valor di dollar ta drenta como reserva, ya cu e extra placa pa consumo ta termina den aumento di importacion. Pero esey no ta tur e analisis.

Relacion debe -producto interno bruto

Posicion di florin ta bao presion pa hopi tempo caba debi na e relacion entre debe y e Producto Bruto Interno (PIB/GDP). Economistanan, y sigur esnan di e instancianan internacional, ta considera cu e debe di Aruba den ultimo añanan ta extremo. Esey a bira mas grave ainda den e actual crisis unda e GDP anticipa pa 2020 ta casi Afl. 2.000 miyon menos cu na 2019. Si sigui saca placa cu ta spaar, pa converti nan na bono pa financia consumo interno, lo yega un momento cu e sistema ta bay for di control. Gobierno lo bay den un spiral di cada biha mas debe y mas interes pa paga, mientras economia no ta back na e nivel cu e tabata, por lo tanto no ta rindi entrada pa gobierno pa cubri e gastonan halto di debe y interes.

E peligro aki no ta algo di un solo periodo di gobernacion, ni di e actual. Ta for di Status Aparte no a logra pa controla e proporcion di debe compara cu e Producto Bruto Interno, pero e problemanan a bira realmente serio desde cu e debe compara cu GDP a surpasa e porcentahe cu ta considera prudente pa un teritorio chikito manera Aruba. Manera tabata adverti tur e tempo ey, no mester sucede tanto anto nos ta den teritorio di peligro grandi. Actualmente gobierno mes ta reconoce cu nos ta na mas di 121% di debe/GDP, mientras cu mester hopi mas ainda pa mantene nos a flote. Mester reconoce cu na e momentonan aki tin un crisis sin precedente, pero netamente esey ta haci dificil pa haci mas prestamo. Ta pa e motibo ey mes cu Hulanda ta ofrece sosten di liquidez.

Con nos a yega aki?

E proyectonan grandi manera hospital nobo, e waf nobo na Barcadera, e proyectonan di Green Corridor y Watty Vos Boulevard tur a agrega mas na un posicion di debe cu ya tabata halto. Oficialmente no ta conta e debenan aki como debe publico, pero parti di loke nos ta paga pa e proyectonan PPP ta debe, y publico, y ta paga interes riba nan. E diferencia ta cu nan ta hinca den unsuma hunto cu e pago di mantenimento pa e proyectonan. Di tur manera, ta paga e proyectonan aki pa medio di belasting, cu ta significa cu ta gasta placa di pueblo y no ta parce cu lo bin un cambio den esaki.

Paisnan manera Hulanda, Grecia, Italia, Spaña a corta pisa den nan gastonan propio, y e paisnan berdad a haci sacrificio grandi. Pero e pasonan interno a yuda economia. Na momento cu ta haci uso di fondonan di pension pa e bononan pa cubri e gasto di interes riba otro prestamonan, por ehemplo, ta e pagador di belasting lo mester cubri esaki despues. E futuro generacion di trahador lo hereda un debe mas grandi cu nunca, lo mester paga mas belasting cu nunca te cu ta resta un scenario cu e peligro di un florin sin valor.

For di prome dia di Status Aparte no a cumpli cu leynan di finanzas publico. Nunca a presenta relatonan financiero y ta presenta presupuesto di Pais Aruba seis te ocho luna despues di e fecha cu ley ta bisa, esta dia 1 di september. Tur e leynan ey ta mas bien adorno, pasobra gobierno tras di gobierno no tin intencion di cumpli cu nan.

Pakico desconfianza di Hulanda

No solamente fraccionnan di MEP, POR y RED pero di AVP a bisa cu e Entidad di Reforma lo no funciona si e ta dirigi for di Hulanda, pasobra e ta mishi cu autonomia di Aruba. E pregunta sinembargo mester ta, con autonomia a funciona te cu awor. Si tabatin un control debido for di Parlamento, e situacion lo no tabata asina deplorable manera IMF mes a ilustra. E ta significa cu Parlamento ta desfunciona y tin cu ta cuminza puntra nan mes si mester di e organo legislativo mes. Hulanda no ta aprecia un modus operandi asina. Esta priminti y firma pa un structura pa mas seguridad, pero toch ta sigui cu e finanzas di bancarota di semper.

E problema di culpa e votador pa e maneho di Gobierno ta algo cu ta scucha tur ora, sigur riba media social. Pero e realidad ta cu e pueblo votador ta traha pa sobrevivi tur dia, y no tin tempo pa controla si gobierno ta actua responsable cu su placa di belasting y fondo di pension. Esey ta tarea di Parlamento. Mas ainda, politiconan awendia ta bisa pueblo cu tur cu ta pensa diferente cu nan, ta robez y cu ta netamente e politiconan aki ta esnan cu ta contribui na e debe.

Na e momentonan aki ta stimulando instancianan local pa inscribi pa bononan di Gobierno, y ta celebra esaki comosifuera ta un logro. Ta trece e informacion aki demasiando den forma di ‘bon noticia’ envez di enfatisa e seriedad di e situacion. Particularmente pasobra e modelo economico di Aruba basa riba turismo di masa ta produci mas presion cu beneficio a lo largo, sigur si hopi di e negoshinan, manera casinonan, no ta paga belasting debidamente na Aruba pero ta crea mas presion riba infrastructura social manera AZV y SVB.

Awor e relacion cu Hulanda ta na peligro, pasobra ta priminti algo y ta haci diferente despues. E conclusion ta cu e realidad di reforma na Aruba ta, cu tur gobierno a priminti esaki, pero ningun a cumpli. Y Hulanda no ta kere cu Aruba por hacie su mes.