Fundacion Lanta Papiamento (FLP) tabata hopi critico pa e falta di atencion cu nos lenga materno Papiamento ta hayando for di instancia gubernamental y otro sectornan di nos comunidad.
E nivel di negligencia pa salvaguardia su uzo corecto ya sea na nivel di educacion, prensa, etc., ta un preocupacion cu a wordo expresa durante e charla cu e linguista Ramon Todd Dandaré a realisa dialuna ultimo tocante e similaridad cu ta existi entre Carboverdiano y Papiamento na Biblioteca Nacional su seccion Arubiana/Caribiana.
Preocupacion
Joyce Pereira di FLP a laga sa cu un di nan metanan ta esun di promove e uzo corecto di nos lenga y e compromiso cu mester existi di tur sector di nos comunidad, incluyendo gobierno y specialmente riba tereno di enseñansa, ya cu esaki ta parti di nan mision. Como fundacion, el a defini nan mision como cu nos tur papiado di Papiamento mester tin conocemento amplio di nos idioma; y mester ta consciente di su balor pa e por haya e luga cu e merece den tur area, aspecto y nivel di nos cultura, pero muy particularmente den nos enseñansa. Nan ta mira cu na nivel di enseñansa introduccion di Papiamento a wordo descuida hopi. E ta indica cu ultimamente FLP a bolbe cay riba e rol di prensa ya cu e ta haya cu te aworaki no tin niun balor educativo pa loke ta idioma. “Mi ta bis’e nechi asina, pero den cualkier articulo e frasenan ta literalmente sin pia y sin cabes.”
Sra. Pereira a anuncia cu pa 2017, FLP lo bin cu un plan pa haci hopi riba e tereno aki. Pero un di e problema cu nan ta haya ta cu periodismo na Aruba ta un profesion no proteha. Cu esaki e kiermen cu no tin niun legislacion pa regula e existencia basico di formacion of preparacion cu un periodista mester cumpli cu ne. FLP kier bin cu investigacion riba tur aspecto di nos idioma; ya cu pa medio di informacion nan por haya hopi informacion cu nan kier comparti cu pueblo pa medio di actividadnan manera congreso, tayer, charla y publicacion.
Publico presente mayoria di nan di e sector di enseñansa tabata hopi critico tambe. Te hasta a wordo informa cu despues di inverti hopi placa y permanece pa tempo largo den magazijn, gobierno pa medio di su departamento di Enseñansa a dicidi di introduci sin preparacion previo, un plania educativo “Ban Conta” pa e materia di matematica den scol basico. E forma con el a wordo introduci ta un señal cu dificilmente lo por garantisa su exito.
