Den un publicacion riba su website ultimo weekend, USA Today a destaca Aruba entre e cinco miho lugar pa un vakantie familiar den luna di juli. E lista ta inclui ademas Alaska, Costa Rica, Utah, y Pennsylvania.
“Conoci pa su beachnan zuiver, resortnan all-inclusive y ubicacion excelente sur di e Faha di Horcan, e isla di Aruba ta un lugar fabuloso pa hiba e muchanan cualkier temporada di aña”, e articulo den USA Today ta destaca. “Pero pa un berdadero vakantie Caribense baña den solo sin ningun multitud, yega na juli, ora cantidad di bishitante ta reduci, y e temperaturanan mas halto ta alcansa 90 grado (32 Celsius). Bo lo spaar hopi den acomodacion y no ta bay tin mester di competi pa un lugar riba e beachnan precioso Caribense di e isla.”
E articulo ta continua destacando e variedad di actividad cu nos isla ta ofrece pa mucha y adulto. “Cu un largura di apenas 70 miya, Aruba por ta chikito, pero ta grandi den actividadnan familiar. Pa esnan cu stima bestia, e isla ta ofrece un variedad di manera pa interactua cu amigonan peludo – of no peludo – incluyendo Butterfly Farm, Aruba Ostrich Farm, Philip’s Animal Garden y e Donkey Sanctuary Aruba.”
Tambe e publicacion ta curasha pa ‘emociona e muchanan cu un trip rapido riba ferry na De Palm Island pa sumerge den diversion cu su water park, tour di snorkel, caminata bao awa cu helm, body drop slide y paseo riba e banana boat.”
Pa finalisa, e publicacion ta recomenda pa explora tur e beyesa cu nos isla tin pa ofrece. “Tour diferente parti di e isla riba cabay, jeep, ATV, trolley of na pia, of haya un bista di bida bao awa door di snorkel na Arashi. Admira e naufragio mas grandi di Caribe abordo di e Seaworld Explorer semi-submarine sin mester muha. Of si bo prefera bay mas profundo, bay dentro di e Aruba Atlantis Submarine Expedition, cual ta bay 130 pia bao di e olanan pa explora e rif na Barcadera y otro naufragionan.”
