ORANJESTAD – Den diferente medio Hulandes a cuminsa core e comentario cu gobierno di Aruba ta parce di no ta dispuesto pa manda e cambionan di ley (LAft) pa parlamento, loke mester a haci despues di firmamento di e protocol entre Hulanda y Aruba aña pasa, pa duna continuacion na e supervision financiero Hulandes, cu na 2015 a keda institui via un ley di Aruba.

E medio koninkrijksrelaties.nu, tambe e peridodista Dick Drayer riba su pagina na LinkedIn, ta expresa e mesun opinion, cu nan no ta mira mucho movecion den ultimo lunanan, mientras cu normalmente e ley mester a pasa parlamento prome cu fin di 2018 pa drenta na vigor 1 di januari 2019.

Koninkrijksrelaties.nu ta cita fuentenan na Aruba cu ta bisa cu “ premier Wever-Croes no tin ningun intencion pa haci esey ainda, a sabiendas cu su propio fraccion di MEP lo desbarata e proyecto di ley LAft. Manera cu Den Haag a anticipa esaki, nan a percura pa cubri esaki den e protocol poniendo un clausula cu si e LAft no drenta na vigor na tempo, CAft lo por evalua e presupuesto di Aruba a base di e normanan estableci den e protocol.”

Tambe e medio digital aki ta observa cu secretario di estado Knops tras di cortina ta trata di persuadi Wever-Croes pa percura pasa e proyecto di ley den Staten. Y ta remarca tambe cu gobierno di Aruba por ta mara na e normanan di deficit den e protocol, pero cu Staten no ta. Ademas, cu desde 1 di januari Cft lo no tin un base legal mas y cu Staten no mester preocupa mes cu nan consehonan.

Mientras tanto, segun e mesun medio, lo tin señalnan cu gobierno di Aruba lo a añadi decenas di miyones na e deficit di 2017 riba papel, pa crea mas espacio den presupuesto pa 2018 pa gastonan extra, ya cu Hulanda a bay di acuerdo cu e deficit pa 2018 lo mag a sali mes halto cu esun di 2017.

Redaccion di Bon Dia Aruba a logra papia cu un di e parlamentarionan di fraccion di MEP, cu a informa cu segun a ser bisa na nan, e proyecto di ley lo ta na Staten otro siman, pa tratamento den curso di luna di mei. E ley lo a tarda entre otro pasobra despeus di conseho di Raad van Advies lo mester a haci algun adaptacion ainda.