Awe ta dia 1 di september, di un aña cu ta pasando manera un suspiro. E ta tambe dia internacional di prensa, y manera semper nos ta dedica atencion na esey, pero e aña aki cu un toque diferente. Esey tin tur cos di haci cu e tempo excepcional cu nos ta bibando aden, causa pa e pandemia di Covid-19 cu tin mundo den un gara firme pa casi henter e aña aki caba. El a golpea gran parti di nos poblacion di un of otro manera. Esnan cu mas a perde den e crisis aki ta e hendenan cu a perde trabao, tin hasta hende cu a perde varios empleo bao di e mesun dak, y si nada no cambia pronto, nos ta mira nos problemanan bira mas grandi so.

Pero tur esey nos sa caba, nos a comenta un y otro biaha, loke lamentablemente no ta haci e problemanan bira menos. Sin embargo, e editorial aki lo ta tocante prensa, nos medionan di comunicacion cu den e crisis aki naturalmente tin hopi di skirbi, entrevista, comenta. Loke no a bira tanto conoci ta ki efecto e crisis aki a trece pa e medionan di comunicacion mes. En todo caso esey no tabata prosperidad, pasobra bo por tin hopi di publica, pero manera tur otro negoshi mester tin un persona, empresa o institucion cu ta paga pa servicio ricibi, si no, e negoshi no ta ‘sostenible’ pa usa e palabra di moda ey. Y igual na tur sector economico, prensa na Aruba tambe a sufri bao di e impacto di e crisis aki. Nos no ta bay mas den detaye con nos mes ta sobrevivi e crisis aki, no ta na nos pa revela asunto confidencial di negoshi, pero loke tur nos abonado y cumprador incidental di nos corant por a ripara ta cu nos mester a tuma paso pa salba e corant ruman Aruba Today integrando esaki den nos edicion, te cu ohala tempo mihor yega atrobe. Nos ta spera cu esey ta pronto.

Mas en general, e desaroyonan negativo di e aña aki ta haci cu cierto tendencia cu ya tabata presente, lo por tuma lugar cu mas rapidez. Un di nan ta cu e presion riba corant di papel a bira mas grandi. Tin menos placa ta circula, un gran parti di nos poblacion ta riba un budget, unda cuminda y otro asuntonan basico ta bay promer cu cumpra corant. Ademas, hopi informacion, casi tur, ta disponible riba internet tambe y no ta costa nada, salvo e inversion pa bo tin acceso. Esey ta haci cu mas ainda e medionan tradicional, entre nan e corantnan cu tin ainda, ta obliga di analisa seriamente nan situacion. Na e momento aki ta talvez demasiado tempran pa saca conclusion, pero ta logico cu pa tur cos tin un base minimo cu mester ta presente pa por opera. Por lo pronto nos lo bisa: “Nos lo cruza e brug ey ora nos yega ey.” Mientras tanto, nos mester sigui eherce e tarea cu nos a scoge di informa comunidad segun nos mihor capacidad y habilidad.

Y aki tambe nos ta topa cu reto. E crisis no a trece solamente hopi mas pa publica y comenta, pero a trece tambe hopi informacion incorecto, y no solamente tocante e crisis mes, sino den tur otro asunto deriva di esaki. Esey ta haci cu, mientras medionan ta lidia cu budget y personal limita, nos ta keda cu e obligacion di informa lo mihor posible, cu e medionan limita ey. Di mes caba den un teritorio chikito manera esun di nos ta dificil pa medionan tin staff dedica na investigacion y analisis. Esaki tin como consecuencia cu mester scoge den loke ta factible pa haci, mas cu den pasado caba. Loke nos ta mira simultaneamente ta un ola di desinformacion, pero tambe un cantidad di comentario riba rednan social cu no tin pia ni cabez. Masha poco bo ta haya un persona cu sa lo suficiente di un asunto pa duna un opinion basa riba conocimento solido. No comprende nos malo, ta bon cu e ciudadano en general a haya hopi mas oportunidad awendia pa vocifera su opinion, pero lesando tantisimo opinion no necesariamente ta duna bo e informacion corecto y al caso cu bo mester riba cual bo por basa bo opinion. Nos ta kere cu aki tin un tarea pa medionan di comunicacion cu, a pesar di nan limitacionnan , por duna guia na e fluho enorme di informacion no structura cu ta yega na e publico.

Sin embargo, esey ta requeri un cos si, y esey ta independencia. Nos ta mira demasiado vez ainda cu ta dificil pa distingui entre hecho y opinion, pasobra esakinan ta bin den un solo pakete, un solo mensahe, cu ta parcialmente informacion y e mensahe politico/ideologico. Y ta aki nos ta mira cu tin keto bay, coronavirus of no, un tarea pa prensa independiente cu ta trece e hechonan y por duna tambe su opinion, pero no bruha den otro. Sigur den e tempo aki, cu pa via di e coronacrisis, mester tuma decisionnan clave cu por influencia nos bida den e proximo decadanan, ta keda importante pa lucha pa informacion corecto, veridico y na tempo. Nos ta sigui den e lucha aki.