Ata a entrega su presupuesto pa 2021 cu ta consisti basicamente di dos presupuesto of escenario cu nan ta premira pa nos turismo entrante otro aña.

Entrada a cay

Despues cu prome biaha cu Aruba Tourism Authority (ATA) a experencia 3 luna y mey di cero entrada. Tambe despues di esey, unabes cu Aruba a habri na luna di juli su frontera tiki bishitante ta keda drenta. Asina directora di ATA, Ronella Tjin Asjoe-Croes a relata na Bon Dia Aruba, y el a agrega cu nos papiando akinan di 80 porciento menos bishitante pa e diferente lunanan.

Te cu aworaki si nos ta mira unda Aruba su turismo completo, incluyendo e prome kwartaal di e aña aki cu a cuminsa bon pa nos pais, y si nos ta compara total di turista cu Aruba a haya te cu september, e ta nifica un caida di 67 porciento di cantidad di turista compara cu 2019. “Esey claro ta impacta entrada di ATA,” directora di ATA a bisa.

Si nos ta mira e presupuesto cu a wordo ahusta a base di tur e desaroyonan ATA ta mira cu pa e aña aki, e instancia aki tin un presupuesto di 67 porciento menos di entrada compara cu loke nan tabata tin presupuesta inicialmente. Pa otro aña –segun directora di ATA- nan no ta mira mucho adelanto segun nan proyeccionnan pa loke ta trata nan entrada.

“Nos entrada principal ta un fusion di entre otro cantidad di hende cu ta bishita y tambe loke nan ta paga pa camber,” el a bisa. ATA ta mira un caida drastico den entrada cu no lo conoce mucho cambio den 2021.

Presupuesto 2021

ATA a entrega pa prome biaha un presupuesto consisti di dos diferente presupuesto: Uno ta sin yudansa financiero, kiermen sin estimulo adicional den mercadeo internacional di parti di Aruba. E ta wordo basa riba entrada limita y nan a reparti esaki den diferente mercado.

E di dos escenario ta si tin un estimulo adicional den mercado internacional pa Aruba. Esey ta e di dos presupuesto cu ATA a entrega na gobierno, y esey lo conduci na un total di mas of menos cien mil bishitante adicional pa Aruba cu lo tin su consecuencia y su impacto economico riba diferente area. Esey ATA a splica recientemente na gobierno y nan ta aworaki den dialogo pa finalisa presupuesto pa ATA pa 2021.

Directora di ATA a splica dicon nan a pone den un presupuesto dos presupuesto pareu. E rason ta cu nan a corta nan presupuesto di mercadeo internacional pa e aña aki cu 45 porciento, teniendo na cuenta e lockdown cu a keda na vigor pa mas cu 3 luna y mey cu logicamente no mester a haci mucho promocion.

Si ATA no tin e ingreso of e estimulo adicional den mercadeo internacional, otro aña y proyectando nan entrada y otro factornan, Aruba lo ta invertiendo basicamente e mesun montante reduci cu 45 porciento di e aña 2020, E ta keda practicamente e mesun porcentahe inverti pa otro aña 2021. Cu e diferencia cu pa otro aña ATA ta spera cu lo tin 12 luna completo di operacion.

Promocion

Nan ta puntonan cu nan a trece dilanti cerca gobierno y teniendo cuenta cu si tin un presupuesto di mercadeo internacional reduci cu 45 porciento, esaki ta comparabel cu loke Aruba Tourism Authority a yega di inverti na 2011, kiermen 10 aña pasa. Es decir tempo cu ATA a cuminsa como un institucion independiente.

Un estimulo adicional cu e otro presupuesto cu nan a entrega e ta comparabel cu loke Aruba y ATA a inverti na 2012 of 2013. “Ainda no ta yega na nivelnan di inversion di loke Aruba a yega di conoce na ultimo añanan,” segun Tjin Asjoe-Croes.

Directora di ATA a bisa cu den momentonan di crisis Aruba semper a inverti rond di di 10 miyon florin adicional den promocion internacional. Esey a yega di pasa durante e suceso di Natalee Halloway, durante 9/11, durante e crisis financiero cu tabatin na 2008. Pues na diferente momento Aruba a pone inversion adicional cu e idea di incrementa e cantidad di bishitantenan.

Pero tambe tin ora -segun directora di ATA- bo tin cu pone mas pa sikiera yega na un resultado modera. ATA ta compromete su mes, si ta pone estimulo adicional, cu nan ta bay pa un total di 100 mil bishitante adicional. Mester compronde cu esey ta un impacto grandi pa economia den diferente contexto.

Tjin Asjoe-Croes a bisa tambe cu mester tene cuenta cu ATA tin un fondo di emergencia, y nan a cuminsa uza e fondo aki caba. E ta wordo calcula, den e proyeccion di ATA, cu lo wordo usa completo pa e otro aña, pues e ta hinca caba den nan calculonan.

Directora di ATA a bisa tambe cu fuera di corta gasto di mercadeo internacional cu 45 porciento, nan a corta tambe cu 70 porciento tur lo cual e instancia aki ta haci localmente den inversion di e producto Aruba. Pues un recorte drastico den esey y tambe a corta den gastonan di operacion mas of menos cu 30 porciento.