(DW) – Organisacion Hapones Nihon Hidankyo ta e ganado di Premio Nobel di Paz 2024 “pa su esfuersonan pa logra un mundo liber di armanan nuclear y pa demostra pa medio di testimonio di testigonan cu armanan nuclear nunca mas mester ser usa”, Comite Nobel Noruego, cu sede na Oslo a informa ayera.
E sobreviviente di bom atomico, Toshiyuki Mimaki, representante di organisacion Hapones Nihon Hidankyo, a spera cu e premio aki “duna mas peso” na e mensahe antinuclear cu nan ta promove.
Nihon Hidankyo ta un grupo funda na 1956 pa “hibakusha” of sobrevivientenan di e bomnan atomico lansa pa Merca riba Hiroshima y Nagasaki 11 aña prome, y for di e tempo ey el a traha pa plama e testimonionan di esnan afecta rond mundo y pa promove un mundo liber di armanan nuclear.
“Mi ta kere cu door di ricibi e gran premio aki, nos palabranan lo por tin mas peso,” Mimaki, kende tabatin 3 aña na augustus 1945, ora cu e prome bom nuclear den historia a ser benta riba e ciudad unda e tabata biba cu su famia, a bisa den un aparicion pa medionan local.
Mimaki a considera cu e situacion actual den Franha di Gaza ta similar na esun di Hapon devasta pa bomnan na final di Segunda Guera Mundial. “Na Gaza ta detene muchanan cu sanger. Ta mescos cu na Hapon 80 aña pasa,” el a declara durante un conferencia di prensa na Tokyo, agregando cu e idea cu armanan nuclear ta trece paz ta un falacia.
“A bisa cu danki na armanan nuclear, mundo ta mantene paz. Pero armanan nuclear por ser usa pa teroristanan,” el a bisa. “Por ehempel, si Rusia usa nan contra Ucrania, of Israel contra Gaza, e lo no caba eynan. Politiconan mester sa e cosnan ey,” Mimaki a insisti.
E movemento Nihon Hidankyo, funda na 1956, a ricibi e recompensa “pa su esfuersonan na fabor di un mundo sin arma nuclear y pa a demostra, pa medio di testimonionan, cu arma nuclear nunca mas mester ser usa,” e presidente di e Comite Noruego Nobel Jørgen Watne Frydnes a bisa na momento di declara e ganado di premio.
E historia di e “hibakusha”, manera e sobrevivientenan di Hiroshima y Nagasaki ta conoci, ta “unico” y nan activismo a contribui na genera y consolida oposicion na e armanan aki basa riba nan propio experiencianan, creando campañanan educativo y advertiendo contra su proliferacion y uso, e sentencia ta destaca.
E presidente di e Comite Nobel a considera “alarmante” cu e “veto riba e uso di armanan nuclear” cu a ser genera como respuesta na e bombardeonan atomico di augustus 1945 awor ta “bao di presion.”
“E premio di e aña aki ta un premio cu ta enfoca riba e necesidad pa mantene e veto nuclear aki. Y nos tur tin un responsabilidad, particularmente e potencianan nuclear,” Frydnes a bisa reporteronan.
Prome minister di Hapon, Shigeru Ishiba, a bisa, di su parti, cu Premio Nobel di Paz na Nihon Hidankyo ta “sumamente significante.”
