Diaranson anochi, 30 di november, a tuma luga e homenahe na e baluarte musical Maybelline Arends-Croes, ken a ricibi e premio nacional Crioyo di Oro 2022. Un homenahe yena cu musica, canto y hopi sentimento cu a demostra e gran carera musical di Arends-Croes.
Premio nacional Crioyo di Oro ta un reconocemento cu ta dedica na personanan cu a dedica nan bida largo na desaroyo cultural di Aruba. E reconocemento aki a celebra su prome edicion na aña 2021 y ta wordo organisa pa Fundacion Go Cultura. Durante e prome edicion di e reconocemento a entrega e prestigioso premio aki na Sr. Jossy Brokke.
Aña pasa Sr. Brokke a wordo selecciona pa e ricibi e reconocemento aki. E aña aki e fundacion a dicidi di haciele un poco diferente y a laga e comunidad di Aruba dicidi pa ken e premio aki lo mester bay a traves di nominacionnan.
Arends-Croes no ta un persona desconoci den e mundo di musica. Cu un trayectoria exitoso como juffrouw, cantante, musico, compositor el a dedica mas di 50 aña na e formacion di hopi cu awendia ta cantante of ciudadanonan cu ta contribui na desaroyo cultural di Aruba di un forma of otro.
Durante e anochi aki diferente artistanan, manera The Young Voices, Grupo Melange, Cesar Olarte, Erika Giel, Rocco Franken, Gloria Vega, Rachel Kraaijvanger, Edjean Semeleer y hopi a uni pa presenta e exitonan musical di Arends-Croes y rindi homenahe na su gran carera musical.
Ariba rednan social por a tuma nota di un gran cantidad di publicacionnan di parti di alumnonan, ex-alumnonan y personanan cu a expresa nan gratitud y aprecio pa e dedicacion cu Arends-Croes tabatin durante su carera.
E premio nacional Crioyo di Oro a wordo entrega door di Minister di Enseñansa y Deporte, Sr. Endy Croes.
