(AP) – E premiere di e documentario di “Lil Nas X: Long Live Montero” a keda posponi despues cu a haya un yamada reportando un menasa di bomb na Toronto International Film Festival.
Diasabra anochi na Toronto International Film Festival, e premiere di e pelicula tabata den plan pa tuma luga na Toronto su Roy Thomson Hall. Esaki a keda posponi pa mas o menos 20 minuut mientras cu e autoridadnan a verifica si e menasa tabata creibel of no. Lil Nas X a ser manteni fuera di e mat cora durante e investigacion di e supuesto bom aki.
Judy Lung, ken ta vice presidente di asuntonan publico y comunicacionnan pa TIFF, a bisa den un declaracion cu e polis di Toronto a investiga den e vecindario di e evento prome cu nan a procede cu e premiere.
“Nos standard di medidanan di siguridad a permanece den luga durante e tempo aki y e premiere a cuminsa cu un atraso chikito,” Lung a comenta. “Den nos conocemento, esaki tabata un menasa general y no tabata dirigi specificamente ni contra e festival, ni e pelicula ni e artista.”
Long Live Montero, dirigi pa Carlos Lopez Estrada y Zac Manuel, ta documenta e tour di 8 luna di e artista cu a cuminsa den september di aña 2022 pa su prome album completo.
