Segun Prome Minister Evelyn Wever–Croes (MEP) ainda ta evaluando si ta otorga un excepcion special na Aruba Airlines pa por conecta buelonan entre Venezuela y Miami via Aruba. Un di e posibel condicionnan lo mester ta cu ta ‘100% sigur’ cu e personanan procediente di Venezuela lo subi avion bay Merca.

E peticion cu tin pa haci excepcion ta den consideracion, pero el a bisa cu mester wak tur cos bon prome cu tuma e desicion. “Nos ta considerando e peticion mirando cu ta trata di famianan cu lo posibelmente perde nan trabou. Sinembargo nos no por otorga un excepcion simpelmente pasobra esey lo por scapa e aerolinea.”

E premier a splica cu e situacion ta uno dificil, sinembargo no kier core riesgo pa un excepcion den ceramento di frontera trece problema pa Aruba. Mientras frontera ta cera gobierno ta delibera riba kico lo bay haci encuanto e situacion migratorio y posibel canalnan extra di unda lo por haya fruta y berdura. ‘Lo mas importante pa Aruba aworaki ta pa mantene frontera cera’, Wever-Croes a enfatisa.

Gobierno a papia cu Aruba Airlines y a defini un par di condicion preliminario. “Si nos ta bay otorga e permiso pa transito, nos mester ta sigur cu nos no lo core riesgo cu lo bin un fluho masal di persona. Nan mester tene nan mes na dje y ta sigur 100% cu na momento cu pasahero ta yega Aruba nan lo sigui transito pa Merca.”

‘Aruba Airlines mester realisa cu nan no por bira excepcion’
Sinembargo a expresa cu si duna exepcion cu ta duna un aerolinea, tur aerolinea kier y a bin cu exigencia, Aruba Airlines mester realisa cu nan no por bira exepcion.

“A wak otro alternativa pero mundo di aviacion ta un negoshi complica. Esaki no necesariamente ta e solucion. A mira esey cu Tiara Air, unda cu Venezuela a neglisha di paga nan 1.000.000 florin.”

Un ehempel di medida cu lo por tuma enbes di haci excepcion pa Aruba Airlines ta cu ATA lo por cubri e suma pa yuda e compañia cu a haya su mes den problema, tin diferente alternativa pa alivia e peso pero exepcion no por ser considera pasobra no tin control.

Te awo no tin fecha fiho pa ki dia frontera lo habri bek, pero e mandatario a expresa cu e no por keda cera eternamente tampoco. Mester evalua ainda ki tempo ta oportuno pa habri’e bek. Gobierno mientrastanto lo yuda ‘unda cu por’ pa e aerolinea no haya su mes den problema, e mandatario a declara.