E hecho cu e documento di 218 pagina cu ta contene mas cu 18 condicion di Hulanda pa pais Aruba ainda tabata bao embargo, esaki a hunga un rol durante e deliberacion y tambe riba cualkier decision of posicion di e participantenan sindical y gremial.

E representantenan di cada gremio comercial y sindicato presente ta na spera di e promesa cu Prome Minister, Evelyn Wever-Croes a haci, esta cu unabes cu gobierno di Hulanda libera pronto e documento aki, nan lo por tin acceso na dje den cuadro di transparencia.

No obstante premier Wever-Croes a elabora riba situacion financiero di pais Aruba. Pero e circunstancia rond di e condicionnan di Hulanda, entre nan e cambio di regimen di supervision financiero di LAft pa RFT. E mandatario a keda di traha un sinopsis di e documento den caso cu e documento no lo wordo libera prome cu diabierna, ora cu decision final di pais Aruba mester cay, pa asina conseho di minister di Reino por duna aprobacion na e di tres fiansa sin interes.

Tanto director di departamento di Finanzasa, Derrick Werleman, como director di Direccion Huridico y di Legislacion (DWJZ), George Croes a duna un presentacion general. E prome riba situacion financiero di pais di Aruba. E di dos riba e concepto huridico, igualdad y diferencia, entre e regimen fiscal di e ley nacional di LAft y ley di Reino, RFT. Informacion cu no tabatin mucho cos nobo di loke ya Bon Dia Aruba a divulga riba e asunto aki den su edicion di ayera.

Premier Wever-Croes a gradici nan presencia y a reconoce cu loke gobierno a pidi di sindicatonan como di gremio comercial tabata algo practicamente sobrehumano. Esta sin cu nan por a haya documento, yuda gobierno pensa riba cual direccion pais Aruba por bay cu Hulanda su condicionnan. Un punto crucial den e deliberacion aki tabata si Aruba tin otro opcion, y segun e mandatario, nos no tin e na e momento aki.

Igualmente riba e pregunta di sindicato SIWA di e consecuencia si gobierno ta bisa no na e condicion di Hulanda, e mandatario a contesta cu gewoon no tin placa. Otro pais di Reino a pidi pa Hulanda duna un posponemento pa no trata nan decision diabierna den conseho di minister di Reino, sino despues. Pero e contesta di Hulanda tabata no. Si nan no trat’e diabierna awor, nos mester tene cuenta cu lo wordo trata te na september, ya cu aparato gubernamental di Hulanda lo drenta den receso pronto. Pero pa e tempo, aya nos lo ta den otro posicion, mas kibra y mas den necesidad y falta di likides lo ta mas grandi, segun e mandatario.

Encuanto si e BTW di 12.5% ta berdad, el a bisa cu ta inclui den e pakete di Hulanda su condicionnan pa Aruba. E ta un proposicion pa tur e paisnan di Caribe Hulandes por tin un solo sistema di BTW of sino AVV, manera ta conoci na BES. Despues di haci investigacion den pasado y discuti nan cu IMF, gobierno a bin cu e decision di BTW, el a bisa. Pero e ta demanda un periodo di implementacion di 18 luna. Sinembargo, mirando e prioridad actual, nan ta mantene tanten na e sistema actual di BBO.