“Cu hopi asombro mi persona a tuma nota cu Prome Ministro Wever Croes a tuma e encargo pa bay asumi responsabilidad di refineria mientras cu partido MEP y su persona lo a duna hopi elogio y reconoce trabaonan di Sr. Glenbert Croes, no obstante cu nos di AVP semper a desmenti esaki,” Melvin Tromp (AVP) ta declara na prensa.
E ta sigui bisa cu fresco den su memoria e por corda con Sra Wever Croes despues di hiba hopi critica y lansando mentiranan fofo pa loke ta e refineria y vota contra di e posibel reapertura di CITGO pero como lider di partido MEP a dirigi un carta pa ex Prome Minister Eman pidiendo pa reconsidera su persona pa por haya participacion na e desaroyonan cu tin di haber cu e refineria. Pueblo mester sa cu esaki tabata mas bien pa haya informacion con pa yega cerca di esunnan encarga cu CITGO pa por yega na negoshinan briyante, segun sr. Tromp.
“Awe tin campañadonan y sostenedonan di MEP cu ta hopi malcontento pa e forma con a kita e cartera aki for di awe Ministro Glenbert Croes pa e por bay saca probechonan via di e figura di Papa. Pa e motibonan ey awe figuranan cu a pleister nan mes cu MEP ta vocifera cu a wordo demostra cu den MEP burico ta traha pa cabay come.”
Tromp ta sigui bisa cu: “Segun informacionnan clave ta indica cu ya caba hopi hende di Minister Glenbert Croes a cuminsa prepara pa bay vocifera nan mes cu no lo bay acepta niun fechoria door di ningun compinchi y mas pio ta menciona bufete di abogacia di Croes Wever Tchong y mi persona kier spierta tur hende cu nos lo vigila hopi di cerca kico lo bay ta e rol di Irius Crius den esaki.”
Conclusion den henter esaki ta cu interes personal y di famia y tambe cierto compinchinan ta mustrando cu esaki mas bien ta mas muestra di cu e rol di e Prome Ministro actual ta pa ta hopi cerca di e proyectonan di refineria y exploracion di gas y posibel otro productonan petrolero y e rol di RDA den henter esaki, segun Tromp.
