E accion di prome minister Mike Eman ayera mainta pa yuda e teamnan cu e limpiesa di e beach na Boca Prins a causa basta critica, como cu e mandatario no tabata bisti proteccion.
E mesun atardi sr. Eman a organisa un conferencia di prensa unda el a disculpa su mes di ‘no a duna bon ehempel bistiendo proteccion prome cu a cuminsa haci beach limpi’. Tambe ‘el a sigura cu Aruba ta conta cu e ekiponan necesario pa proteha tur trahado y boluntario cu ta desea di participa den e accionnan di limpiesa’. “Aruba tin e tipo di coverall nan cu por bisti pa proteha curpa, tin definitivamente glove nan y si tin mester, masker!”
E ta splica cu den ‘su emocion di dialuna mainta para na Boca Prins ta wak e sushi, e no por a evita di pasa man pa hark y cuminsa haci algo’. “Ora bo mira e paisahenan bunita wordo menasa, mi mes no a duna bon ehempel y no a tuma e preocupacion necesario. No tabata e miho ehempel, pero tabata door di e gana di yuda.”
E prome minister ta adverti hende si cu kier yuda limpi, pa proteha nan mes como cu no ta conoci ainda exactamente kico ta e composicion di e ‘patches’ di azeta ta cu ta yegando na beach. Pero locual cu nan a tende di Boneiro, e patches ta contene petroleo y otro kimiconan cu ta malo pa hende y bestia.
Bon Dia Aruba tambe a papia cu Departamento di Salud (DVG) riba e punto aki. “Mientras nos no sa kico e ta, nos tin cu tuma tur precaucion posibel. Esey ta bay den colaboracion cu DOW, brandweer tambe ta bezig ta sostene DVG pa wak e tipo di material cu nos tin y protocol cu mester bay na dje pa e uzo di e materialnan aki”, director Jerry Staring ta bisa. Ainda e departamento ta ocupa cu e prome preocupacion y medidanan pa e siguridad di e personal cu ta haciendo sondeo di e problema. Testmento di bida marino of cualkier otro material di awa lo bay sea departamento di higiena of departamento di naturalesa y medio ambiente.
