“Ora nos regla esaki (uzo di cannabis) e lo ta garantisa cu e ta uzo medicinal. […] Ora nos bin cu e lista di producto di cannabis, bo dokter tin cu prescribi esaki. Mescos cualkier otro remedi. Claro por tin abuso, cu ta pasa awo cu por ehempel morfina. Pero e riesgonan chikito ey lo keda.”

Ayera anochi ora parlamentario di RED Ricardo Croes a entrega un mocion pa urgi gobierno pa acelera e trabou di e comision di gobierno cu ta haciendo e sondeonan necesario pa legalisa cannabis pa uzo medicinal, esaki a keda desaproba, cu solamente 6 personanan sosteniendo e mocion, mientras 14 a vota contra.

Si esaki lo a crea duda cu en caso cu e mocion aki no ricibi sosten coalicion lo cay den otro prome minister Evelyn Wever-Croes (MEP) a desmenti, bisando durante un conferencia awe mainta cu ‘prome, durante y despues di e reunion publico di ayera nochi mi a sigura Ricardo Croes cu nos lo bay acelera e investigacion relaciona cu legalisacion di cannabis medicinal’.

Mocion desaproba, gobierno si ta bay di acuerdo
E mocion mientrastanto tabata encera mas cu e idea pa pone gobierno acelera e proceso pa legalisa cannabis destina pa uzo medicinal, mirando cu entre otro e ta menciona, e manera con ta haci test di droga (entre otro riba uzo di cannabis) prome cu un persona haya un trabou y no riba pia di trabou. Ademas, ta argumenta cu un tal test riba uzo di cannabis ‘no ta mescos’ cu test otro substancianan pasobra cannabis ta keda den un persona su sistema mas largo cu e otro substancianan.

Ademas, e urgencia pa bin cu e legalisacion tratando cannabis medicinal lo a deriva di e importancia pa trece esaki pa personanan cu ta pertenece na comunidad rasta y e comunidad cu kier haci uzo di cannabis medicinal legal, cual actualmente segun e mocion ta discrimina contra di nan a base di nos constitucion. Pues a urgi gobierno pa ‘para tur trato cu ta crea desigualdad’.

Con leu e comision ta cu e sondeonan pa legalisa e medicina of remedi di tera aki sra. Wever-Croes a contesta bisando cu gobierno a concretisa e comision cu a institui ora a drenta gobernacion den un decreto ministerial ‘poco tempo pasa’. E comision aki ta resorta bou minister presidente su auspicio.

Comision tratando aspecto medicinal, legal y tambe di cultivo
E comision ta enfocando riba dos area actualmente: riba e parti di salubridad y riba e parti di e legislacion mes. “E aspecto medicinal di e legislacion ta encera cu tin cu determina ta cua e productonan deriva di cannabis cu nos lo apunta como remedi. Di parti di e minister di husticia nos ta trahando riba e cuadro legal cu tin cu duna esaki, weitando ehempelnan den otro pais riba con nan a haci esaki.”

Ademas, e comision aki tambe lo investiga cu aporte di representantenan di ministerio di asuntonan economico y di sector primario si promove e cultivo di cannabis (entre otro) lo por trece desaroyo economico. “Pero riba e parti aki mi tin cu admiti nos no ta asina leu, apenas nos ta den fase di orientacion pa esaki.”

‘Tin hende ta haya alivio pa dolor cu cannabis’

Prome minister a expresa cu su propio ruman a sufri ‘masha hopi’ pa via di cancer y ‘mi ta kere ora un hende ta pasa den algo asina y bo ta mira bo ser keri pasa den asina hopi dolor loke cu bo kier ta alivia su dolor y pa e keda poco dia mas cu bo na mundo. Y pa esey algun hende ta haya alivio den cannabis’.

Prome minister a splica cu aunke e mes no a yega di purba cannabis, ‘si e ta trece alivio na ser keri den un momento asina no tin un hende cu por ta contra dje. Pero na momento aki e ta ilegal. Y e personanan cu ta uza esaki ta uz’e clandestinamente. Nos mester haci algo pa e no sigui clandestinamente’.

Mas aleu prome minister a splica cu pasobra cu e substancia ta ilegal, ‘hende ta paga hopi placa pa un pochi chikito di azeta, y bo no sa ki azeta bo ta haya aden’.

Pues aunke cu e mocion no a haya sosten den parlamento, ‘como gobierno nos a duna nos palabra si cu nos lo acelera e proceso. Te hasta e prome persona mi a tuma contacto cu ne awe mainta ta e persona cu ta coordina e reunionnan aki pa asina e yama un reunion mas pronto cu ta posibel’.

Cannabis prescribi mescos cualkier otro remedi
Alabes un miembro di prensa di portal 24ora a puntra si lo percura pa tin un distincion entre medicinal y uzo recreativo. Riba esaki prome minister a contesta cu ‘p’esey nos ta tumando nos tempo den e comision pa haci un trabou bon’.

“Ora nos regla esaki e lo ta garantisa cu e ta uzo medicinal. Por ehempel actualmente personanan adicto na paracetamol por haya esaki por medio di botica. Otro hende ta haya esaki prescribi pa dolor. Pero ora nos bin cu e lista di producto di cannabis, bo dokter tin cu prescribi esaki. Mescos cualkier otro remedi. Claro por tin abuso, cu ta pasa awo cu por ehempel morfina. Pero e riesgonan chikito ey lo keda.”

Finalmente prome minister a splica cu no lo ta posibel pa cultiva esaki na cas pa via di cualkier dolor, si no cu lo haci esaki mescos cualkier otro remedi.