(NLTimes) – No por ta asina cu lidernan di partidonan den coalicion ta bay determina kico e Gabinete ta bay haci, Dick Schoof a bisa den su prome entrevista como prome minister cu corant De Telegraaf. Como miembro di PvdA, el a bay “riba caminda derechista” pa motibo di su experiencia como ambtenaar na servicio di inteligencia AIVD y autoridad di inmigracion IND.
“E Gabinete ta tuma decision. Mi por wel imagina cu ta bay tin scrutinio den algun caso – specialmente riba asuntonan hopi sensitivo manera estado di derecho y migracion. Pero na final, ta keda na e Gabinete y no na lidernan individual di partido, of ministernan individual, pa resolve esaki individualmente cu otro,” Schoof a contesta na e pregunta si ministernan ta tuma decision sin papia cu nan lider di partido.
Tampoco tin “asiento adicional na e mesa di Gabinete” pa lider di PVV, Geert Wilders y lider di NSC, Pieter Omtzigt, manera e entrevistador a bisa. Segun Schoof, “esakinan ta comentarionan increiblemente laaf. Den mi opinion, nan ta irespetuoso pa cu e prome minister aki. Ta realmente inapropia pa referi na nan comosifuera nan ta den gobierno tur ora.”
Tocante su periodo den PvdA, e prome minister a bisa: “Mi ta kere cu pa motibo di e diferente trabao cu mi tabatin, ya mi tabata den e banda derechista di PvdA. Y cu un cantidad grandi di realismo a bin den mi bida.”
Su periodo den IND a dun’e forma den termino di migracion. “Mi a mira ambos banda di e medaya. Refugiadonan cu a keda den berdadero necesidad y a keda pega akinan den un sistema di asilo cu tabata completamente pega. Hasta e tempo ey. Pero tambe bo tabata mira e otro banda: e hendenan cu tabata buscando un miho bida y tabata manipulando cos.”
Migracion y vivienda ta e puntonan unda e prome minister kier logra resultadonan real. “Mi tambe kier purba trece hende hunto un tiki, mira si nos por bay cu otro un tiki. Hende no ta disgusta otro intrinsicamente.” Schoof a boga pa no exagera e diferencianan den posicionnan. “Esey ta un riesgo den nos sociedad.”
Segun e, Gabinete Schoof II lo ta “hopi straño.”
“Mi ta un prome minister no-partisano. Si e Gabinete aki completa su termino of fracasa, ami no ta bay participa den eleccion. Mi ta spera di tin 71 aña e tempo ey. Lo ta hopi straño si nan no haya un candidato di entre nan propio hendenan despues di eleccion nobo.”
