(AP) — Prome minister Italiano, Giorgia Meloni a bisa su partnernan di Union Europeo diahuebs ultimo cu reduci fluhonan di migracion for di paisnan Africano tin menos di haci cu ofertanan di caridad y mas cu partnershipnan fuerte hunto cu inversionnan na e paisnan en cuestion.
Meloni a bisa reporteronan na un conferencia di prensa fin di aña cu e acuerdo di luna pasa riba Pacto di Migracion y Asilo di UE parcialmente a mehora e situacion pa Italia y otro paisnan asilo, pero no ta representa un solucion na e yegadanan cada bes mas frecuente di migrante.
“Loke mester haci na Africa no ta caridad,” el a bisa. “Loke mester haci na Africa ta construi cooperacion y relacionnan strategico serio como igualnan, no predadornan.”
Meloni tambe a insisti riba e necesidad “pa defende e derecho pa no mester emigra… y ta haci esaki cu inversion y strategia.”
Reformanan riba cual lidernan di UE a acorda luna pasa ta basa riba un set nobo di regulacionnan gobernando con estadonan miembro ta responde na hende yegando Europa. E acuerdo a ricibi critica pisa di gruponan humanitario, bisando cu e lo reduci e derechonan di hende den migracion.
Meloni a bisa cu sostene e desaroyo di Africa y e peligernan presenta pa inteligencia artificial (AI) ta bay ta entre e temanan clave pa Italia durante su presidencia di un aña di e Grupo di Shete (G7), cual Roma a asumi na comienso di januari.
Italia a delinea su strategia proponi na Africa den e asina-yama Mattei Plan – yama pa Enrico Mattei, fundador di e gigante estatal di azeta y gas, Eni – cual ta busca pa expande cooperacion mas leu cu energia.
Meloni a bisa cu e plan ta inclui proyectonan specifico, pero no a duna detaye, agregando cu ta bay revela esakinan den proximo simannan.
E lider Italiano a admiti cu resultadonan den combati migracion ilegal – un di e prioridadnan top di su gobierno di coalicion derechista – te awo ta decepcionante.
Gobierno di Meloni a haya critica di gruponan di ayudo y oposicion iskierdista despues di aproba leynan mas pisa di inmigracion, restriccionnan riba operacionnan di rescate riba lama, y plannan pa construi centronan di recepcion di migrante na Albania. Pero su promesanan electoral pa stop fluhonan masivo di migracion na Italia a keda mas tanto sin cumpli. Na 2023, e caminda for di Nort Africa door di Mediteraneo central pa Italia a bira e ruta di migracion mas druk na Europa.
Segun UNHCR, un total di 260,662 persona a crusa e Lama Mediteraneo for di Nort Africa pa Europa desde comienso di 2023. Datonan di ministerio di Interior Italiano a mustra cu e yegadanan di migrante na Italia a aumenta 50% na 2023 compara cu e aña anterior. Como 155,750 migrante a alcansa costanan Italiano aña pas,a incluyendo mas di 17mil menor no acompaña, compara cu 103,850 na 2022.
“E data riba migracion no ta satisfactorio, specialmente considerando e cantidad di trabao cu nos a dedica na esaki,” Meloni a bisa, agregando cu e ta bay continua traha cu paisnan Africano pa preveni salida ilegal di migrantenan. “Mi meta ta pa traha na Africa, blokea e salida for di Africa, evalua e posibilidad pa habri hot-spotnan eynan pa establece ken tin derecho y ken no pa bin Europa,” Meloni a agrega. “Na mes momento nos ta bay traha riba migracion legal.”
